حزن و أمل!!
يلّلي عَليكي الهـوى عم يبعت الأحــزان
والناس قالو صِباكي تغيَّـر زيــــادي
طلّـي قبال الشمس بِوجهـك الفـــتان
النـور اشتهـاكي خــبز للشمس زوادي
معـروف انُّو بِوجهِـك لمحـة التحــنان
وعيون خضـرا ع لمسة سحر معــتادي
مزروع فيكـي الأمل بالـرَّوض والأفنـان
وتمِّـك حكاية جمر ع شفاف وقــَّـادي
يلّلي زَرعـتي الأمل وردات بالبســـتان
عا كل ورقـــه قصيدة شعر من شـادي
وقدّيـش شـاعر كتب فيكي مْن القِصـدان
تَ يْشوف تِمّ الورد عا مبْسَمِك بـــادي
والعمر لولا غـدر ما بيـرحـم الإنسـان
وجــه الِمـراية ماْ خبَّى سـرّ كالعادي
بيظل وجهك شـغف عا لوحـة الفــنان
وشاعر بيلملم وحـي من دمعـك النـّادي
خلّـي بروحـك أمل لا تتركي الأجفـان
يغلب عليها النّعس في سـنين كيَّـــادي
وتغيب رهجة قمر مطلـع شـهر نيسـان
ويخرس نشيد الهـوى بـِ اْوْتار عـوَّادي
مهما زمانــك غدر وتغـيـَّر العَّــدان
بـاقي حَـلاكي نـغـم في لحن إنشـادي
ما بين حـزن وأمـل لا تخسري الميزان
ما زال روحك ع قلبي كتيــر جــوّادي
رح ظلّ حبِّـك برغم العصف والطوفـان
وْبِشرْع حبِّـك انا ماْ لْحِقْت إلحــــادي
يا مُنْيِةِ الـرُّوح قلبي بالهـوى هَــيمان
ورح ظل مركب أمل عا شـطِّك الهـادي
شروقي طويل
حكمة عمك أبو الحب:
مهما الألـم يقسـى عَلى قلب الحبـيب
والدهر يكتب عَ القلب دمعـه ونحيـب
بيبقى أملـنا كبيـر عَ جْـروح الحـياة
وبلسم شفـاء الـروح وبيبقى الطبيـب