شَعْرِك الـْ كان يْلِفّني ويْنام

شَعرك

الـْ كان يلفّني ويْنـامْ

لفِّة عْيون الطفل بالأحلامْ

ومِنُّو لحالو كان يتْخَصَّل

خِصْلِة إلي مْخدِّة

وْخِصْلِة حْـرامْ

وأغفى

وْشعرِكْ يِسْهر عْليِّي

وبْغفوتي يْسَبِّل عَ عينيِّي

وأوعى

ولفُّو بين إيديِّي

متل الملاك بْتخْت ريش نْعامْ

ولمَّا كنِتْ إصْحى مْن الوهْلِة

وجدّلِك بالعتِم عَ مهْلي

تـَ جْدايْلك تِضْحك وْتِندهْلي

وتْقول: خلِّصْني من الإعدام

بْيِظْهر عِرِف شَعرِك رَحِ تْقِصِّيه

وْراح يندهْلي تـَ إشْفع فيه

وْما في إلو غيري ..

أنا مربِّيه !

وبيني وبينو فَرَّقو الأيامْ

وإنتي ضميرِكْ بالعمى موصوفْ

ومتلِك الحلاق

ما بيشوفْ

وصار شَعرك

متل شي خاروفْ عم يحتمي بالدِّيب من لحَّامْ

وإنتْ يـا حِـلاق

بِدْعي عْليكْ: أللهْ يِنْقل هـمّ قلبي لَيْكْ

أصعب مَ تِعمى

وييْبسوا إيْدَيكْ

ويصير عمرَكْ مدرَسِةْ أوهامْ

كيفْ لكْ قلبْ

تِقْطَع أمل عمري ؟

وانْتي ..

يا إمّ الأملس الخمري

فْطمْتي طفل

رابي على غمْري

تـَ تْعيّشيه عَ سِفْرِة الأيتام !

كيف تـَ الِمْقصّ لْفَوقْ شَعرك مَرّ

طاوَع إبِنْ آدم

عَ فِعْل الشَّرّ

وْيا هل تُرى

مَطْرَحْ ما شَعرك هَرّ

ما انْفَلْشِت حْكايِة مْنِ الآلام ؟؟

هايْدي حْكايِة مِنِ دْموعي البكِرْ

الـْ بِقْيو مِنِ عْيوني

بِشَعرِك ذِكِرْ

وْهاوْدي نِقَطْ مِن شَمْع قِدْسِ الفكِرْ

هودي..

ألف قاموس إستفهامْ

بَعْدو معي مَنْديلِك الأصلي

بْكَرّمُو

وبْعاملو بْأَصلي

وتـَ يْضلّ يبْكيلِك، ويِرْقِصْلي

مِن شِعرك الـْ بيحِنّ عَ وَصْلِة

إنْ كــان عنْدِك بعْد شي خِصْلة

ابْعتيها اليَوم

ذكر للمنديل ..

حتّى يْشَبِّع جَوْعْتو

وِيْنـــامْ.