"كان العمر بْأوَّلو" .. أغنية جديدة من كلمات منصور الرحباني

الأغنية الجديدة التي سيؤديها الفنان غسَّان صليبا في افتتاح مؤتمر "الصحافة تحت الحصار" الذي يقام في الذكرى السنوية الأولى لاستشهاد الصحفي اللبناني جبران تويني في الساعة العاشرة من صباح اليوم الأحد في "البيال" كتب كلماتها الفنان الكبير منصور الرحباني ولحَّنها الموسيقار أسامة الرحباني وعنوانها "كان العمر بأوّلو" ..

كان العمر بأوَّلــو        والحلو حلو
وعْصافير المَصْطَبِة         لعِنَّـا ينْزَلو

كان العمر بأوَّلــو        والحلو حلو
مش عارف فيه ع الطِّرْقـات ناس بيقتلو
ومن قلب الصَّبـاح         طلعتْ رياح
والسَّارق طِفِي المنارهْ      وراح

يا شعبي الدَّاخلْ
بِوجَع الدَّاخلْ
أنا صوتي النَّاحلْ           بيعرف القاتل المخبَّى
وبيِأمِن بْعدالِة جايِي         تـْردَّلي السـلامْ

 

ع حَبْسي بِمْضي
ع المنفى بِمْضي
ع موتي بِمْضي             دمِّي حبْـر الحقيقهْ
واذا ما بِمْضي بدمِّي        ما بيثبِّت هالكلامْ

مين اللِّي قطف الزَّهرة؟
الجسد    بيتحوَّل زهرْ
بيتحوَّل عَ طول الدهرْ
بيـرجع بْلمَعَان النهرْ
بيرحل مع الطيـــر      الراحل ع الشمالْ

مين أخد نعس الطِّفلْ
تَرَكـو بلا نوم وفَلّ
تَرَكـو بالغربة وفلّ
الحقيقة جايي عَ الكل
يا سـارق الخبــز             وْنَـوم الأطفـالْ