المطْرح

المَـطْــرَح

كابي دعبول

ْبْتُوصَلْ تْلاقِي عُمُرْ عَمْ يسْرَحْ
وِ العِطِرْ فَجْأة بْيرْجَعْ بْيمْرَحْ
وْ فَجْأة السَّما بْتِشْلَح عَ دَرْبَكْ نُورْ
وْ عَصْفُورْ يرْكُضْ مَعْ فِرِخْ عَصْفور
مَطْرَحْ مَا تَارِكْ حِلْمَكْ المَهْجُور
بِتْقُول آخْ... رْجِعِتْ لِلْمْطْرَحْ...

بْتِقْرا إسِمْ مِمْحي عَلَى لِحْجَارْ
وِ المَوجْ فَجْأة يْعَاكِسْ التيَّار
وِ صْخورْ تِرْجَعْ تِضْرِبَا الرَّعْشِة
بْتِجْمَدْ كَأنَّكْ حَاسِسْ بْوِحْشِة...
وْ مَا في حَدَا تِلْمَحوا وْ تِفْرَحْ

مِشْ هَونْ كانِتْ تِنْدَهَكْ عَالبَابْ
عَجِّلْ بَقَا عَمْ يكْتَرُوا الخِطَّابْ
وْ تِحْتَار كيفْ بْتِخْطِفَا وْ بِتْروحْ
مِنْ دُونْ مَا تِتْرُكْ حَدَا مَجْروحْ
وْ تِرْجَعْ تِحِسّْ بْجِرحَكْ المَفْتُوح
وْ تِضْرُب وْ تِقْسُمْ وْ تِجْمَعُ وْ تِطْرَحْ
وِ تْقُول آخْ... رْجِعِتْ لِلْمَطْرَحْ...