غافي وْبِفيِّة رِمشْها تْخبَّيت

غافي وْبِفيِّة رِمشْها تْخبَّيت

إلى عاصي الرحباني

ناصر منذر

عاصي.. بْمِتل هاليوم* ما تأبّيتْ

ناداك الكبير**.. النِّدا لبّيتْ

يمكن حَسَدْنا عليك.. أو رادَكْ إلو

وإنتَ الـ بفنَّك شَرْقنا ربّيتْ

كنت الكبير بـ بيت رحباني حلو

وبعدك يا عاصي اليوم ربّ البيتْ

المشوار مع فيروز.. إبنَك كمّلو

ويا ريت بيكمّل بَعْد يا ريتْ

وفيروز كلما الناس عَنّك يسألوا

بتغمّض العَينين ت ما نقشعَك

غافي وبِفيّة رِمشها تخبّيتْ

--------------

·        21 حزيران يوم وفاة عاصي الرحباني

·        من كلمات عاصي الرحباني في أيامه الأخيرة:

"بدي روح لعند الكبير.. خلّي يفتحلي بابو الواسع.. فوق بعرف.. فوق بحل سرّ الإشيا"

"أمتين بدو يخلص المشوار.. بدّي ينكسر الزمان ت ينتهي العذاب.. صار لازم روح لعند الكبير"