شــام

شـــام

ناصر منذر

أبيّة يا أرض شام الأبيّة

يا مشعل نور يا نجمة سَنيّة

وقت ما تخلّد بهالكون ابنك

كتب إسمك بأوّل أبجديّة

كتب إسمك بأوّل سطر خطّو

ومقامك جنب عرش الرب حطّو

ومِتِل ما عِشِق موج البحر شطّو

المجد عشقك يا مهد العبقريّة

المجد عشقك شَكَل غارك ع راسو

وجَعَل من راية خصومك مَداسو

ووقت عِرْق الدهر عايَن يباسو

زَرَق دمّك بِعِرْق السرمديّة

زَرَق دمّك بروح زهور عِطْرة

وعصَر قلب الشمس ت زاد قطرة

بسراجك وقت شحّ الزيت خَطْرة

بأمل ما يشوف نارك منطفيّة

بأمل ما يشوف جوري الورد دابل

وأرض الخير شاقِت للسنابل

خَلَق بردى ونِسي جنّات بابل

بغوطة فاقت الجنّة البهيّة

بغوطة فاقت الجنّة بحلاها

ع شكلا ما خلق الله سِواها

وسماها قلب سوريّا سماها

وحماها من الأذى رب البَرِيّة

حماها من الأذى بجسمو حماها

وحمل روحو على كفّو فِداها

البطل يوسف سَكَب دمّو وسقاها

ت بقيت شامخة وحرّة وأبيّة