يــاحـرف

يــاحـرف

مروان السليمان

بين المعاني الحرف هاج وماج

ولَوّع خَياَل الشاعر المِهتاج

غارَت بْفكْرو نبعة التّعبير

وبْكوخ موهبْتو انْطفى الِسْراج

***

ياحرف يلّي طايع بْإيدي

بْكفري بْصلاتي بْشَقوتي بْعيدي

شوباك هالمَرّه معي غصّيت؟

متل النَّفَس عَ بْواب تِنْهيدي

***

ياشاعري باقي أنا بإيدك

كلْما تْناديني عْناقيدك

إنتي تْخطّيت العتم والنور

وهَوني أنا مابقدر بْفيدك

***

لما بْتدْخل هالحقل بتْشوف

ذابت بطيّاتو جُمَل وحْروف

إنت وأنا نفس اللّحن مِنْصير

ومافي فَرق بيْن واصف وموصوف

marwan@centrum.cz