مشتى الحلو ومرمريتا بين حدّو وقحوش

مشتى الحلو ومرمريتا بين حدّو وقحوش

جمـاليــا

نشر الشاعر المهندس زاهر حدو، المغترب في دولة الامارات، قصيدة حنين الى بلدته الجميلة مشتى الحلو، وذلك في موقع بلدته. فردّ عليه الدكتور اياد قحوش المغترب في كندا بقصيدة يعبر فيه عن جراح الغربة وقساوتها.

يسرنا نشر القصيدتين في موقع "جماليا" لنقدم للقراء تقاسيم الشوق واللوعة للضيعة والأهل والوطن المعزوفة على أوتار قلبي الشاعرين.

وإلى الأخوة القراء الذين لا يعرفون البلدتين نعرّفهما بأنهما من أجمل البلدات السورية ذات الطبيعة السّاحرة والناس المضيافين محبّي الفرح والاحتفال ومحترفي الحفاوة بالزوّار.

موقع "جماليا" يدعوكم لزيارة مرمريتا ومشتى الحلو وبلدات وادي النضارة في مهرجانات الفرح والمحبّة كلّ صيف.

قصيدة المهندس زاهر حدو - مشتى الحلو

ليل و مدينة و نـــاس مجهولين
وطيفِك،ع بــاب الذاكرة، سـهيان
متل الحبيبــــة الْغابت مْن سنين
و بعدا عـم تخايــل ورا النّسيان

...

و لمّا الحنين يصير متل السّيل
بتغفــى المدينة بلـيـل عينيكـي
و ما بيبقــى غيــــرِِك بهاللّيل
وضو القمــــر عم يسرح عْليكـــي
...

شبْر و شبِر بتْخايـــــلِك و بصير
إرســـم حلاكـي شعــــر بكتابـــي
و الشوق يللّي كــان عشب زغير
صـار عا مَرّ الزمــــن غــــابـــي
...

مشتاق .... للسّقْعة بْلـَياليكي
لْصـــوت الشّتي ع سطوحِِك القرمـيد
للهـــوى الشـّرقي البـِخلِّيكي
حكايـِةْ.. وسهــرة.. وموقَدي.. ونْبيد
....

لأوَّل طلوع الضــّــو عَ نيـسان
بالنور يرســــم عَ ضْبــاب الْجرد
ونسمـة تحيِّد ع نبـع بردان
وتــروح ترقـــص عَ كمـــام الورد
....

مشتاق... ترجَعلي سْنين عـْتاق
و إرجَـــع صبي... إلعب على تْرابِـك
لا إكبَـر.. ولا سافر.. وإشتاق
ولا إكـتـــب قْصـايـِــد عــن غـْيابِـك

**

قصيدة الدكتور اياد قحوش - مرمريتا

بْهيكل الغيبه
بْروح شِقّ حْجاب
السّفره الطّويله .. وكل مابْهجّي
بُعدِك
بشوف سنين عمريحْساب
و"جدول ضرِب" بيفزّ عاوجّي
..

الغربه تلج
والذّكريات دْياب

وجوع الحنين بقلبنا ضجّه
لاتْفتّح جْروحي .. عَ ماضي غاب
خلّي الوجع مطمور بالقجّه
..

شجرة الغربه
الواقفه بالباب .. و بْظِلّها الأحلام مِحْتَجّه
ما قْدِرْت منها
لمّ
غير كتاب
انكتْبِت بِدَمعي قْصايْدو الفجّه
..

وعالشوق
ياما فوق صخر غياب
مرجوحتي
دجّت ألف دجّه
وماكنت غيّر برْمِة الدّولاب
وماضلّ عندي عالبعد حِجه
..

يازاهر
انْ شِفْت الزّمان .. ضْباب
والشمس كعبِه
والأرض حَجّي
من غربتك عيّط على "زرياب"
يعزف
تَ نِدْبُك قهر "عالرجّه" *

**