"عيونِك" .. سجال شعري باشتراك شعراء العامية في موقع "جماليا"

        1. حسّان بسطاطي

عْيونك .. وْ آخِر لَون

لوّح وِانْطَفى

وِتْهَدَّل لَيالي سود

عا كَون

مـالو حْـدود

وْآخر قمرْ

طبّق جْفونو واخْتفى

و تْهِبّ ريح .. تْزَوبِع

وْتِفْزَع دِني

مْنِ الخوف طَرْحَه

مْسَودَني

تِرْجُف شَجَر .. ليْل وْعَتِم

ويْطوف شلاّل المدى

وْتِغْرق الدّنيا عَ الهدى

وِتْفتّح عْيـونك.

يْطِلِّ الصِّبِحْ أخضر 

وتوقع رْموش الدّهب

من رفّة جفونِك.

***

        2. عصام يوسف

عْيونِك إذا بِيْحَوّشوا

كِلِّ المَدى

مَوسِم عَجَب

شو بْتعمل الدّهشه

بّبِستان الندى

بْتِخْلَص متِِل بَحّة قصب ؟؟
بْتوقَفْ عَ شبّاك السّهر

وِبْتنعَس بْقَصْرُن  

شو بْتقدُر تعِدّ النّجـوم !!

بِتْصير تِخْتصْرُن ..

بِتْصِبّ كِبّايِةِ غْروبْ

مِن خابْيِةْ عَصْرُن

لا تِعِجْبوا .. نْجوم السّما

طيّبْ مِتِلْ

خمْرالصّلا عَصْرُن

بِتْخاف ما يِبْقالْها من هالدِّني

إلا الشِّعر .. هَلْ عَمّدو

جِرْن الكِحِل .. ما لو سِني

خلّيه نايِمْ بالسّرير

يِحْلم بِلِعْبِهْ وْ سَوْسَني

وْلا تْوَسّعي عْيونِك كْتير

بْخاف ما تطير !!

الدني ...

***

        3. د. فريد حردان

عيونك

طقشْ .. للمَوج عاشاطي الرّحيل

وْشاعر صَفَن .. يِتْخيّلِكْ

شلاّل طالِع عَ السّما

وْقَـومَع هَرََمْ عَ النّيـل

..
وْزَقّ الْوَحي

عن سلّم مْواويل

رَقْوِةْ عجوز ..

وِمْسَبَّحَه ..

خَرْزِه وْخَرْزِه

مْدَحْرَجِه تْراتيـل

حِنّة قصيدة عطر

عَ البَحْرِ الطّويـل

قِجّةْ رَبيع

مْطفَّحَه

وَرْد .. وْنخيـلْ
..

..

عْيــونِك
كَراسي إعْتِراف..

سْكُـوتْها

غِفْـران ..

بَخُّـور وِقْنـاديـلْ

بسّ تْفَتّحِيُّن .. عَ الْمَدى

بْسَمِّعْلِك الإنْجيــلْ

وْبَسْ تِنْعَسي..

مْلايِکِة ألله

بْيِلِبْسُو مْراويــلْ.

 

*********

1.               حسّان بسطاطي:        شاعر منبري وفنان من مشتى الحلو . سوريا 

2.               عصا يوسف:          شاعر ومهندس من مشتى الحلو. سوريا

3.               د. فريد حردان:         شاعر لبناني مهاجر