غابت الشّمس

كلمات: أسعد السّبعلي

تلحين وغناء: وديع الصَّافي

غابِت الشَّمْس

وْبَرْدِت النَّسْماتْ

وْلِبْسِت قميص اللَّيْل ضَيْـعِتْنا

وْحَطّ الْفَلَكْ عَ جْبالْها شالاتْ

وْباتُو الطّيُورْ بْسِنِدْيانِتْنا

وِانْدَرَزْ خّدّ السَّما

شامــاتْ

بيض

مِتْل زْرار فِلِّتْنا

وِالنَّدَى سَقْسَقْ عَلَى الْوَرْداتْ

هَالْفَتَّحُو بْحِيْطان حارِتْنا

وْعِرْزال ..

تِحكيلُو الدِّني حْكاياتْ

حْكاياتْ عَنْ أمْجاد أرزِتْنا

ياما عَ دَرْبُو حامِتْ فْراشاتْ

وِنْجُومْ غَطِّتْ عَـا سْطَيْحِتْنا

وْمِنْجَيْرة الرَّاعي لَها عَنَّاتْ

قَدَّيْشْ فَرْقِتْ شَعِرْ حَوْرِتْنا

وْعا كِلّ حَفِّة .. باقِةِ بْنَيَّاتْ

قَصِّتْلُن فْساتينْ

لَوزِتْنا

ياما عَلَيْهُنْ حَنِّت اللّفْتاتْ

وِتْنَهَّدو

شْبَيْبات حارِتْنا

يا اخْتي ..

انْ شاالله بْتِنْجِلي الغَيْماتْ

وِمْنِلْتِقي

مِنْ بَعِدْ غَيْبِتْنا

مِشْتاق للْمَعْبُور

للرِّزْقاتْ

للمَصْطَبِة ..

لْتَنُّور قَبْوِتْنا

لْدَقِّ الْجَرَسْ

لِلْمِخِلْ

لِلْقَيْماتْ

لِلْعَيْن

لِحْكاياتْ جارِتْنا

للرَّاعْيِة السَّمْرا الـْ ورا العَنْزاتْ

لِلميْجانا

لْفَيَّاتْ خَيْمِتْنا

لِلْكَنار .. الأصْفر الرّيشاتْ

يِنْقُرْ خْصُور كْواز تينِتْنا

لِلْمَحْدَلِة

للسَّطِحْ .. لِلخَشْباتْ

لِلكاس يِضْحَك عا سْكَمْلِتْنا

صَلِّي مَعي

يا حِلْوِة الْخَيَّاتْ

تـَ نْعُـود يا اخْتي ..

هْمُوم حاجِتْنا

ما بْيِرْجَع لْخَيِّك هَنا الْغَفْوات

تـَ الشَّمْل يِجْمَعْنا

بْضَيْعِتْنـا