يابيتها - قصيدة

يابيتها

يابيتْها.. لْ دايبْ عَ غـِـيّــابو

وعا شجرة العنّاب

عَ جنابو..

قدّيش ضيّفْني

أنا وْسهْــران

من كل عِنّابات عِنّابو

.....

فاق الْكِحِل

عا لوْحْةِ الأجْفـان

يْرَوتِشْ

بأهدابي وبِأهْدابـو

وعا قَوْس قنْطَرْتـو

الشّتي  النّعْسان

بْقوس القَدَح يعْزُف

عَ نِشّابـو

.....

وْبابو.. مِتِل

دفتر موسيقا كـان

وْكِلْ مَ الهوى الشَّرقي

فَتَحْ بـابـو

عود الحطب

بيدَوْزن الألحـان

وْمتْلِ القَصَبْ

بيدِقّ مِزْرابـو

.....

وشِبّــاك..

من تلْج الدّني بِرْدان

يا ما قْـزازو غَــزّ

بِخْشـابو

متل اللي بَعْدو

مْنِ الصِّبـا عِشقــان

وْصورِةْ حَبيبو

بْتِجرح جْيـابو

.....

ومَمرق..

على غْياب القمر

زعلان!!

ضْفـافـو

مِتِل نهْر العمر شـابُو

كِلْ مادَعَسْ

عَ سياجك النِّسْيان

بْتِبْـكي

نِدي بالبال أعشابو

.....

ويا سَقف شو حِمْلوك

هالحيطان!!

متل الجرح

مَ بْيحمُل عْذابو

ياريت مِتْلُنْ

يِحْمُل الإنسان

بسّ الفنا

مَ بْيِحْمُل تْـرابـو

.....

رِجِعِتْ

بخيال الضّو عالألوان

إتْذكّرو

وإسْأل عَ أصْحابو

قلّي يا شاعر

"كان يا ماكان"

كل اللي ضوَّيْتُن

بِقَلْبي شْمـوع

عا شَمْعدان

الذّاكـْـرة دابـو.

مشتى الحلو