مِثْل مْصَيِّف الغور

دَوّرِتْ: في كُل الصّحارى
فِ المَغايِرْ...
عَالدّروب الرّاحْلِه..
فوق الجّبال إلْ ما يُصَلْها طيرْ
وِالنّجوم السَّاهْرِه...
صَفْنَتْ بِعَتْم الليل هَالمِمْتَدْ
طول الليل...
بِقْيَتْ ناطْرِه
ما عِرْفَتِ انّو هُناك
صارو النّاس...
بْحِسِّ نْحاس
وْبْقَوالْب عاهْرْه،
مَ تْحَمّلو خيبِةْ أمَلْهِنْ
وِالجّيوش الخاسْرِه
حَطّو على جْروحاتْهِنْ لُبْخِةْ بابونَجْ
تْفَرّقو قْبال الوُحوش الكاسْرِه
ما قِدْرو هيكي يِرْجَعو.. وْلا يِقْحَمو
عا هَالأماني العاطْرِه...
فوق غُصْن الزّنْزَلَخْتْ
تْنَطْنَطو..
مِثْل الفَراشِه...
الحايْمِه وِالحايْرِه
هَجْرَتْ زْرار القُرُنْفُلْ وِالبَنَفْسَجْ
واعَدَتْ وَهْج الحَرايِق
بِالوُعود القاهْرِه
يا حيفْها قَدِيش هَالغُرْبِه
يَ غُلْبي...
كَسْرَتْ خاطْري.

* مِثْل مْصَيِّف الغور: مثل شعبي يُقصد منه، وعاد بخفي حنين.