أيـــام وَصْلِـــك

أيـــام وَصْلِـــك

سيمون عيلوطي

- 1-

بْعيد عَنِّّك مالْها طَعْم الحياه

ما في بْحياتي شي...

رَحْ يُبْلُغ مُناه

غير العَتِم المْكَوَّم بْموج السِّحاب

وِسْنين تُمْرُق ..

عا عذابي بالسَّراب

وِالأسى بِسَهْم الضّنى...

قلبي رَماهْ.

- 2 -

يُخْطُر عَ بالي أتْرِكِك وَروح

لَبْلاد ما فيها هوى وِجْروح

وَارتاح من نار النَّوى وِالحُب

ما عود أمشي ...

عا جَمِر هَالدَّرْب

وما أبكي من صَدِّ الحبيب ...

وْنوح..!!.

- 3 -

أيَّّّّّّّّّّّّّّّّّّّّّّّّّّّام وَصْلِك تِلْعَب بْقلبي

تْواسي هُيامي ...

وْلَوْعِتي وْغُلْبي

فْ ليل الهَجِر إلْ طَعْمو مثْل المِلْح

يِفْتَح بِروحي ألْف جُرْح وْجُرْح

يْسَوِّد سِنيني ...

وْحالْتي وْدَرْبي.

- 4 -

أشتاق أضُمِّك بين إيدين القَلْب

وْأحِن عَليكي ...

مِثِل زَمان الحُب

وِتْواصليني....

وْتوفي في وَعْدِك

أنعَف بوساتي في صَفا وَرْدِك

وَاقضي حَياتي....

من شِفافِك غُبْ.

- 5 -

قَلْبي لولاكي يَباس

صَحْرا الجَفاف بْروحي داس

وِانْتي مَعايي يْغَنِّني عَصفور الجِنان

يْزَقْزِق معاكي...

أحلى ألْحان الحنان

يِطْرِبْني من رِجْلَيي حتى الراس..!!.

- 6 -

لَحْظات قَليلِه باقْيِه للوَعْد

وَلْقاكي في بستان عبير الوَرْد

وِنْطير عَ جْناح الهَوى لَبْعيد

مِثْل الحمام نْعَشِّش بْقَرْميد ..، ..

وْقِعْت فيكي بين هَزْل وْجَد.

- 7 -

مَرَّات أفَكِّر أتْرِكِك وارتاح

مِنْ هَواكي...

وْفِل بِميت جْناح

لَبْعيد بَلْكي قْدِرْت أنساكي

تاري حياتي صحرا لولاكي

مَعاكي وَحْدِك بَهْجَع وْبَرْتاح.

سيمون عيلوطي

محرر موقع "موقد" الثقافي

www.mauked.com

maukedwebmaster@netvision.net.il

صلاح داود - تونس