ضلي ضحكي
ضلي ضحكي
عدنان ا حلاوي
ضلي ضحكي ومعليش لو يحكوا البشر
ولولا يقولوا تنينا مجانين
ضحكك ورد بيفوح ع حفاف القمر
وعمري بدونك عتمة كوانين
ضلي ضحكي تايشحد البلبل حكي
ويبقى الفرح منشور عاوسع المدى
وعلّمي الشحرور فنّ التكتكة
انت النغم والكون من بعدك صدى
ضلي ضحكي وإنسي معي الأحزان
ضلي ضحكي وعبّي الدني ألحان
لا تعاندي هالدهر بيضيع العمر
ولولا بتسمتي بيضحكو ورود الزمان
ضلي ضحكي هالعمر بعدو بأولو
وعيبي تخلّي هالزنابق يدبلوا
خلي الدني أعياد
النهدات يبقوا بعاد
وكل مابْتسمتي المرّ بيصفّي حلو
ضلي ضحكي