شـوحـه - ليلة شتي
شـوحـه
ليلة شتي
د. إياد قحوش
دْموع الْغُيوم
خْيوط مسحوبه
بْكفّ الشّتي
عا أرض
طيّوبه
وديانها
فْناجين مفتوحه
وجْبالها
فْناجين مقلوبه
*
و ببيوتنا
مْزاريب مبحوحه
وسْطوحنا
العل خوف مطبوبه
نامت بعبّ الرّيح
مرجوحه
وفاقت
ع خشْبة برد مصلوبه
*
والغابِةِ الْعَ تلّ
مشلوحه
وبين النهر والنهر
مزروبه
بتنزل عليها العاصفه
شوحه
وبتنتّف بشعر الشجر
إيدين ..
طفله وعم تشدشد بلعُّوبه
**
كانت أمي بليالي الشتي وقت تنيّمنا أنا وأخواتي تحكيلنا حكايات عن الشّوحه.
هالقصيدة هديه لأمي بمرمريتا..
*