طريق الحرير

اعملّي جَوانح منْ شمِع

بالعيد

تاعلّي وْطير

... و تَضّلّ تحْرقني

تَ يشْعَل بالدني ليل الضّمير

..

حْبالك شتي

زيح الحبال ارْبُطْهن بْكوع الفقير

بردايْتين كْبار

فتْحو عالسّما مسْرح كبير

تاشوف وجّ الشّرق عم يرْكد

عَ طرْقات الحَرير

..

هودي المَجوس

جبال ع طْراف الأبَد سهرو كتير

وعن ضَهِرْهُن

تـَ يْركّعولك .. نزّلو الغيمه حصير

..

مدّيت إيدك عالقمر

صار القمر كاسةْ عصير

اتطّلّعت صوب العاصفه

اتشردق بِ ريقو الزّمهرير

و شو كبير .. ياه ..!

كبير إنْت كتير

والعالم زغير

نشالله ماعاد طفل يخلق بمغاره .. وكل طفال العالم يعيشو بسلام - إياد