بحّـار الشتـي لـ منصور الرحباني

بحّـار الشتـي

لـ منصور الرحباني

جوزف أبي ضاهر

مَدُّن صَبيعو ع النجم

طفْيو

سَكّر الليل

وفَلّ

كيف فلّ

وكان هوّي الباب

         والبواب

دشّر تيابو تراب

فوق تراب

ودّا خيالو يغفّين

غفيو

***

متل الشتي

خيّط العشب عياد

غطّى الأرض

بـ زهور وحساسين

وشو فرّق بساتين

ع كل الضياع

وسهول حبّ

تساع

شعر

وحكي

وحلوين

وبيوت

قمحا ولاد

ويضحك

يطلّ البَرقْ

يلمَحو كل الشَرِقْ

عم يعلّق بـ السما

قنديل

زاح العتم

شفّق صبح

ويميل

صوب الحلم

يخلَق زمن

غير الزمن

يرسم وطن

غير الوطن

يكْسرو تاج الدهب

يشتري بـ حقّو

لعب

في زغار مش رح ينطرو

بكره ع غفله

بيكبرو

ب يبوّسو دَيْن التعب

شافن

متل ما حبّهن

جوّا القلب

ندهن شعب

غير الشعب

تـ يقلّهن

كونو المدى

ما بتشبهوا إنتو حدا

تـ يعلّمن

كيف يكبرو

بـ المجد

يكتب عليهن

وعد:

جبينكن ما ينحني

...    ...

ودار ضهرو لـ لدني

شفنا الدني

قبّة فَلك

بحّار رايح بـ الشتي

وحدو

عم يسافر مَلك.

14/1/09