3

:: إنسان الكهف ::

   
 

التاريخ : 04/07/2009

الكاتب : د. إياد قحوش - إلى الشاعر عمر تنن   عدد القراءات : 1640

 


 

إنسان الكهف

هديي للشاعر عمر تنن

د. إياد قحوش

 

فيّي هوا وتراب
فيّي همس
صخور نمّل

 فوق منها الّلمس

وملّ الوقت

من صرختي .. وماملّ

صوتي ل تفجّر

من حواسي الخمس:

الّلون ل ضوي

 درب الزمان

و حَلّ

ع قماشة البكرا

صدى للأمس

وبكرا بعد م بموت

بدّو يضلّ

منّي نوازل

فايتي بالأرض

ومنّي صواعد

طالعه عالشمس

 

 

 
   
 

التعليقات : 6

.

18/07/2009

Eiad

هلا عمر

وتسلم على القصيدة الحلوة..
الباب الما بيفتح بإيدك بتخلعو.. وبتفوت
وما بينخاف عليك ولو الطريق طلعه

و يسلم فراس حبيب الشعر

وبلكي منشوفكم عن قريب

محبة صادقة

 


.

18/07/2009

tanan8@hotmail.com

عمر تنن

دكتور إياد

أول شي بعتذر كتير على التأخير بالرد لأني لهلق حتى شفت القصيدة والفضل للصديق فراس حبالتي اللي دلني عليها

تاني شي بتشكرك كتير على هالهدية الرائعة والغالية عليي

تالت شي اسمحلي وبكل تواضع قول

الشعار لما بيكتبو قصدان

حتى القصيدة يكون إلها مْكان

بيكون فيها بيوت مسبوكين

عالزيبق وعا قدِة الأوزان

لكن إنت قصدانك الحلوين

كهوف بدل بيوت بالبنيان

وكل كهف فيهن عجبة التكوين

بيشبه جعيتا في أرض لبنان

و"أهل الكهف" لو حظهن تخمين

يودّيهن على درب كهفك كان

كانو بيغفو بس تسع سنين

وتلات ميّة عام بيضلو

يتأمّلو "بالكهف والإنسان "

عمر تنن

 


.

05/07/2009

Eiad

البشرية هيي أجيال، والأجيال بيوصلها ببعضها التواصل مع الأرض من هوا وتراب، والنظر للأعلى..  للضوّ، للسرّ الكبير الواقف خلف أسرار كتيرة.

   وكلّ جيل بيترك  لون، بيحلّ  شوي عقماشة  الزمان..


هيدي قصة هالإنسان العايش بكهف الدني..  و صوتو مرافق الحياة.

******

الشاعر يا سوزان بيحسّ بالصّخر متل ما بيحسّ بالمي.. ويا ريتني شاعر.

شكراً لمرورك المعطّر بأريج الياسمين


.

05/07/2009

سوزان

و حَلّ

ع قماشة البكرا

يا ريت يا إياد يكون قماش البكرا شفّاف حتى نقدر كلنا نكون شفّافين، هيك منصير نشبه خيالات بتمرق بالأحلام وما فينا نمسكا..

الشغلة الوحيدة يللي أنا متأكدة منّا هيي إنو "البكرا" اللي بيرسموا شاعر ما في يكون غير شفّاف، لأنو كلماتو نبعة مي بتنبع اليوم من أحاسيسو، وبتمرق علينا بكرا لتروي عطشنا للكلمة، والمي ما فيها تكون غير... شفّافة، ولوحدا عندا قدرة الحفر بالصخر بدون ما تجرحو. 

مع محبتي

سوزان

 


.

04/07/2009

Eiad

شرف  لي حضورك يا إستاذ حبالتي وإعجابك بالشعر أردّه لكونك شاعر جميل .
وسيسعد روّاد جماليا حتما بالاضطلاع على نتاجك الشعري

ولا أنكر فضل محبتكم 

إياد

 


.

04/07/2009

Firas Habalti

وبكرا بعد م بموت

بدّو يضلّ

منّي نوازل

فايتي بالأرض

ومنّي صواعد

 طالعة عالشمس

 

أسجّل إعجابي الشديد دكتورنا الغالي

 


 

   
 

.