3

:: الليل - هديي للشاعر الدكتور ماجد سطاح ::

   
 

التاريخ : 02/06/2009

الكاتب : د. إياد قحوش   عدد القراءات : 1817

 


 

الليـل

هديي للشاعر الدكتور ماجد سطاح

***

د. إياد قحوش

 

 

بينزل ع كل الناس

بيبلّش غياب

بيكبر عتم

بيفيض

ع الأربع جناب

بتجنّ  فيه الأرض

بتجيب القمر

نقطة  دلع

بتبقّع ب نصّ التياب

*

وبتركد نجوم البعيده

ع السّهر

وبيزرزبو

حبّات من بين الجياب

متل الكأنهن مسبحه

بجرن انكسر

وتفرفطو الخرزات

ع وراق الكتاب

*

في ناس قالو

الليل

خمر من الحجر

في ناس قالو

رْماد .. من صوت الدياب

وفي ناس قالو

كتر مَ بيخطو البشر

بيمرق ضباب الروح

ع تراب الجسد

بيرطّبو

وبيروح لبعيد الضباب.

 

 

 
   
 

التعليقات : 14

.

18/07/2009

Eiad

شكراً يا دكتور ماجد

كلامك بيفيض من قلب أبيض منشان هيك بيطلع تلج عميلعب مع طفل..

وقصيدتك عيونك بتفتح مدى ما بيتسكَّر

محبّة

 


.

11/07/2009

sattahdms@yahoo.com

د.ماجد سطّاح

يا نيّالي بالهديي

قصيدتك يادكتور إياد بتشبه صندوق سحري..

عناصر الطبيعة والحياة جوّاه مثل الدُّمى.. بيتحرّكوا بأصَبيعك بكل براعة وخِفـّهْ.. تَيخلّو القلب الواقف على الشبّاك يخفق مع كل حركة جوّى هالصندوق، تَ يقول سبحان الله اللي عِطيك هالموهبه.

 كل الشكر لهاللفتة الكريمه منّك... وكلـّك ذوق


.

04/07/2009

Eiad

سلام يا سلام

شكرا لتعليقك اللطيف.
حسّيت لما قريت تعليقك بزخّة شتي ما بيغرّق نزلت عليّي.
كانت ستّي تقللي الشتي حلو بس بعد الشتي أحلى. وأنا بقللّك، القصيدة بعد تعليقك أحلى وأنا أسعد  وجماليا أكبر.

الشعر عالم فيه فينا نرجّع الوقت، ونلوّن المي، ونكمش الريح،  وفينا نروح قبل ما نروح.. ويمكن نرجع بعد مانروح .

الشعر متل الضوّ بيفوت بس ع قلوب شبابيكها مفتوحه.. ويا خطيّتو المافتح بقلبو شبابيك.

البركة فيكي وبشعراء جماليا الكتار أساتذتي وأحبّائي

ومرّه تانية أهلا فيكي بعيلة جماليا

 


.

04/07/2009

salamkanjo@gmail.com

سلام كنجو

يمكن عدت قراءة هالقصيدة شي عشر مرات وكل مرة بضيع بجمال هالليل وسحرو

وبنسى إترك التعليق ...

إنتو بجماليا بتحبّو تترجمو الجمال ترجمة ما بتخطر عا بال الخيال

بتجن فيه الأرض

بتجيب القمر

نقطة دلع

تبقع بنص التياب

كل الصور حلوة كتير... وأحلا شي فيها انها بتخلي القارئ يوقع بحب اللغة المحكية

ويتساءل وين كانت مخباي اسرار حلاها؟

أكيد كانت ناطرة إحساس إنسان فنان متل الدكتور اياد يعرف كيف يطالع بس الآلئ

من بحرها والمرجان...

من أجمل ما قرأت في الشعر المحكي قصائدك يا دكتور

دمت جميلاً.

 


.

04/07/2009

Eiad

قديش اللّيل مظلوم بعنصريّتنا  لأننا منشوفو أسود.. لازم نفيق ونعرف إنو ما بقى نحكم عا حدا من لونو ..
الخطيّه بيعملها الإنسان وبيتهم فيها الليل ..

يا سلام ع كلامك شو حلو يا ليلى

وشكراً للطف مرقتك من هون

إياد

 


.

04/07/2009

ليلى الأمين

كتر مَ بيخطو البشر

إذا منفكّر منلاقي إنو أول خطيّة هيي إتهام الليل بإخفاء كل السلبيات مع إنو الليل هدوء وسهر وقمر

شو منخطي بدون ما نعرف، وشو بيسامحنا الليل وهوي عارف

الوصف في القصيدة رائع، شكراً لأنّك جعلت من ليل الكلمات...نهار

 


.

04/07/2009

Eiad

يا حبيب
يكتّر خير جماليا وعيلة جماليا لأنو لولاهم كانت هالقصايد بقيت بيني وبين الليل.


عشرات القصايد قبل جماليا كانت تطلع معي بالليل، بوشوشها للسهر، بتبقى بالذاكرة وبعد فترة بتروح وما حدا بيعترف فيها غير الليل يللي بيعرف حكايتها.

السهر نافذه ما إلها لون بعتمة الليل.. كلّ الألوان بتبيّن من وراها.

دايماً شكراً لمرورك وذوقك ومحبتك للشعر

إياد

 


.

03/07/2009

حبيب حبيب

سعيدة... طلتك بهالليل 

إياد

يمكن أحلى شي بهالعيشة هوّي السهر

والسهر ما بيصير بالنهار

الشمس يا إيّاد بتطلع  بقوّة بتمحي الليل والعتمة ومنفيق بكير معها متفائلين،

 بس شي مرّة شفنا قدّيش الليل أقوى وشفنا الشمس عند المسا كيف عم يحمّر وجها من الخجل..

ليش هالبقعة عم تصغر؟

قولك لنقدر نشوف المفرقعات أكتر ودخان البارود

يصير ضباب الروح 

 

 


.

03/07/2009

Eiad

الليل شرشف بيغطي هالدني وبيخلينا نستريح من رؤية زحمة هالأرض..  يمكن هيك يا هادي منشان نحلم.
ما بتخمّن معي إنو الأحلام طريقة للإبتعاد عن ضجيج الواقع؟

وقت كنت زغير، كنت إسهر عالشباك وإحلم بجزيرة للشعرا والموسيقيين وللأدبا والفنانين بس..

 وكنت اتخيلها سهرات وشعر وموسيقا وغناني.

 .
ليك بعد ماكبرت غيّرت رأيي.. صرت شوف شو صاير بالفن وبالشعر.

شكراً لوجودك الدائم الحيوية

إياد

 


.

03/07/2009

Eiad

أحلى شي باللّيل يا سوزان يا " عطر الليل " إنّو ما بينكمش متل عطر ياسمينتك وزقزقة عصفورك.
مرّات شو طويل هالليل.. ومرّات شو قصير.. مع إنو هوّي، هوّي..

بتعرفي خيريّي إنو الإنسان ما بيقدر يغيّر بطول الليل وبشكلو وبلونو.. وما بيقدر يبعجو أو يفختو باختراعاتو الخلّبية.. لولا شوية تشحوط ع حيطان الليل بضوّ سيّاره من هون وزعيق حفله من هونيك كان اللّيل بهالإيام هوي نفسو يللي مرق ع آدم وحوا.

شكراً لحضورك المبهج والمسرّ
إياد

 


.

03/07/2009

Eiad

يا إستاذي الغالي ندرة

 والله اشتقنالك واشتقنا لقفزات قلمك في حواكير الابداع. 

أنا وزغير كنت فكّر اللّيل غبره كثيفه سودا بتغطي الأرض بس مافينا نلمسها.

**
شكراً لإطرائك اللّطيف وهيدا من محبتك للشعر

سلّم ع أميرة الفرح وفرح الأميرة


إياد

 


.

03/07/2009

هادي بشروئي

وبتركد نجوم البعيده

ع السّهر

وبيزرزبو

حبّات من بين الجياب

ونحن عندما نقرؤك نفتح جيوب القلب لتلقّف نجوم الكلمات المتساقطة من قصائدك

قصيدة جميلة جداً يا دكتور، تأتي في زمن تصحّر الصفحات من عطر لا زلنا ننتظره

هادي

 


.

03/07/2009

سوزان

لو قُدِّر للّيل أن  يجيد القراءة، لشمخ برأسه بعد وصفك، متطاولاً على نور الصباح، داعياً إيّاه للتشبّه به.

ولو قُدِّرَ للصباح أن يرى، لامتلأ قلبه غيرة من ليل كتبت يدا الشاعر فيه أجمل التشابيه.

أحتار في اختيار الصورة الأكثر تعبيراً وأتوه في مقارنات تنصبّ في خانة الرسم بريشة شاعر- فنّان.

دمت، إياد،  متمتّعاً بنظرة صقر يلتقط الحروف المتساقطة ويلبسها من إبداعه صوراً ولا أجمل،  فتختال القصيدة على الصفحات بهيّة كالعروس.

مع محبتي دائماً

سوزان

 


.

03/07/2009

ندره . ع . يازجي

وأنت أيضاً أيها الشاعر الكبير ترسل لنا من وقت لآخر ما يجعل الروح تنتفض من بين الرماد.. ويُشعِر القلب والحواس أن الدنيا لازال فيها الكثير من الجمال

ندره 

 


 

   
 

.