3

:: إياد قحوش.. إنت الملك بمملكة الشتي ::

   
 

التاريخ : 02/01/2016

الكاتب : الشاعر رفيق أنيس روحانا   عدد القراءات : 1810

 


 

 

ديوان "مملكة الشتي" للشاعر الدكتور إياد قحوش غنيّ فوق كلّ الغنى، جميل قدّ كلّ الجمال، رائع بمدى كل الروعات.. ديوان بيقلّك مع سعيد عقل: "ياكسّرو لِ قْلام   يـامِتْلي اكْتبو".

 

الحكي عن كل لعبات الشعر بهالكتاب بدّو إطروحه، وأنا ما معي رخصه بالحموله من العمر ل باقيلي إلا اكتفي بنقطه من بحر .

 

كل شاعر كبير بيبقى عندو صور معيّني بتركّز ع شي من الوجود، وبتصير تظهر بشعرو من خلال عدة أشكال .

إياد عندو شي عشرين صوره ورح إكتفي منن بصورة الشمس .

تعو نقرا شوقال عن الشمس :

 

- "الشمْس غال بْهالسما

  مْعلّق ع باب الرّيح

  وفوق الجبل غابِه

  فيها السجر علّاقة مْفاتيح ".

 

- "وبتدعسي بنصّ الشّمِس

   تَ تْصير خلخالك ".

 

- "ليش الشّمِس ع الشّام مَ بتطلع؟".

 

- " مَ بْشوف إلا مْبارح مْعلّق

    بْهالشّمْس عاهلّق".

 

- "لو كان سقْف اللون

   قشّه شمِس

   قشّه فيّ ".

 

-"مشيت تحْت الشمْس

 عكّزت ع خْيالي ".

 

-"وعلّقت كرمالك تريّة فيّ

  بْزردة الشمْس وصرْت .. هزّلك شوي شوي ".

 

-"لبست القمر والشمْس بجريي

  ومشيت ع شْطوط الدني .. وحدي شوي شوي

  معقول إنّو القمر والشمْس .. بينفّدو بالمَيّ !".

 

-"هالكون إلنا منعرفو

  وصابيعنا فوق القمر والشمْس

 هالفتحتين بقلْب منجيرة فضا ".

 

-"والشمْس حلْقه مْعلّقه بسقْف الزمان ".

 

-"وبتطقّش بْصابيعها

  طقشة شمِس مابين صابيع المواج ".

 

ومامننسى كيف كان إياد يحكي عن الشمْس بدون مايذكرا بالإسم، كان يقول مثلَن: "بكّير، الصبح، الغياب، النجوم، وجّ الضو، الكواكب، الليل ..".

 

وهلق السؤال: شو يعني الشمس وليش؟

الشمس هيي النبع للي منّو كل نهر النّور.. النّور للي هوّي كل ألوان الفرح .

هيّي الصراحه النابعه من الحق ..

الحركه للي وحدها هيّي الحياة ..

العالي للي هيي رمز لَ "العالي"..

هديّي لل ماعندن هديّي ..

الكلمه للي عَلْنِت صار في عنّا وجود ..

هيي الكرم للي ماوقِف يعطي ..

اللون للي حامل كل ألوان الجمال .

 

ياخيّي إياد قحْوش، وْقاف بِوجّ الشمس، إنت شاعر كبير كبير كبير.. لما بتشتّي شعر إنت الملك بمملكة الشتي.

 

 

 

 
   
 

التعليقات : 0

 

   
 

.