حوار الجمال والشعر
رنيم اسحاق وصيفة ملكة جمال العرب في أميركا في حوار مع الشاعر الدكتور إياد قحوش
بيقلولك شاعر الضو شو يعني شاعر الضو؟
الشاعر كاهن جمال
ويمكن لأني علّيت ع جبال القصايد تماثيل ضو فاتحه أياديها لفوق بيسمّوني شاعر الضو.
يعني إنت بتصلّي بشعرك؟
مع الشعر بضل عم إسمع جراس عم تعيّطلي من بعيد
بشوف السجر شموع
والضبابه عبقة بخّور
ووجوه الناس قُوَن.
شو أحلى شعر مصلّى سمعتو؟
صوت النبوعه.. ميّ ناعمه وشفّافه عم تبرم بهالأرض من البحر للغيوم للشتي للتراب وبالأخير بتشقّ الصخر وبتطلع
دورة حياة مابتشبع صلا.
شو بتعنيلك القصيده؟
كرم ع درب
بستان بيروح كلّو ضيافه.
وقت بتكتب قصيده بشو بتحس؟
لمّا بتخلص القصيده بحسّ إني أغنى إنسان بالكون.
ليش بتكتب شعر محكي؟
لأنّو اللغه المحكيّه نهر ماشي مابيقبل يكون بحيره.. بيتعب من الوقفه.
طيب شو بتقول للي مابيعترفو بالشعر المحكي؟
يبّطلو يحكو اللغه المحكيه مع ولادهم وأمهاتهن وبيّاتهن.. ويبطّلو يسمعو غناني ومسرحيات فيروز و وديع الصافي باللغه المحكيّه.. وبعدين منتناقش وباللغه الفصحى إذا بدهن.
ويللي بيقولو اللغه المحكيه بتأثر عالشعور الوطني؟
اللغه المحكيّه لغتنا كمان
الفصحى بتروح عالمدرسه تاتتعلمها بس المحكيه بتتعلمها بالبيت من الأهل..
يللي عم يدافعو عن البلاد بيحكو مع بعضهن باللغه المحكيّه
بس شوفي الغربا مابيحكو لغتنا المحكيه.
ممكن تستعمل بشعرك كل المفردات العاميّه؟
كل شاعر إلو قاموس.. أنا قاموسي الحكي للي فيني قولو قدام إمي.
شو أكتر شي بيحرّضك تاتكتب شعر؟
الذكريات للي مطعّمها بالأحلام.
شو في شي بتحبّ تكتب عنّو وبعد ماكتبت؟
الوجوه الغريبه والبريئه للي بتمرق بمناماتي
الخيالات المخبّايي بالعتمه
عُرَب السّكوت.
لمين بتكتب شعر؟
لكل الدني.. حتى الحجار المنسيّه بجبل السايح للي كنت إقعد حدّها وصلّي لحالي ومشتقلها كتير.
لشو بتشتاق كمان؟
لصدى صوات للي راحو.. وبعرف هالصدى بعدو بيروح وبيجي بالوديان.
بيقولو عنّك مابتكتب شعر غزل كتير؟
أنا بكتب شعر حبّ معمّد بالمحبّه.. الغزل ممكن يكون وثني.
مين أكتر شي أثر فيك وبشعرك؟
الطفوله للي فيّي ومابتختير
بس أصفن بيمرقو قدّامي ولاد متل ملايكه من تلج ومغطّسين بالدهب.
وصفلي التالي :
الشمس : ميدالية دهب ع صدر الزمان.
الليل: ممكن يكون مسودة بُكرا.
الشعر: مملكه مكدّس فيها صوات شفافه.. وخيالات ملوّنه.
ليش قصايدك قصيره؟
لاء.. في عناقيد وفي خصل.. البيهم يكون بالحبّه في طعمة أيلول.
طيب ممكن تعطينا متل عن خصله؟
نهوند:
ليلة هوا
وهالغصْن طول الليل
بيحفّ حالو
بقنطرَة قصْرك
بيجوز متلي عنّ عابالو
يشمّ العطر
من حفّة الجزدان عاخصرِك.
وعنقود؟
النهر الكبير:
بيمشي
ومالو خيال
بيضل يمشي بهالدني
يفرّق سْلال سْلال
بيعرف طريقو مْنين
مابيغيّرو
و معلّمو بجبال
بضياع
ومدن
قديش جايب للدني
مكاتيب
وشو قاطع مهاوير
وماشي كتير كتير
ت يروح صوب البحر ويقلّو
يابحر.. كيف الحال
..
بيمشي..
اذا بيشوف صخرا بينحتا
وبيعملا تمثال
ون شاف جوره.. بيطمرا
ن كانت غميقه كتير
بينطّ من فوقا
وبيزتّ حالو بهالفضا شلّال
دروبو نزول
نزول
ن شاف القمر طالع
وتعبان بالطلعه..
بيعزمو ع المي.. وبيشقلبو
ع تلال بعد تلال..
ومرات منّو لحالو بينعس وبيروق
بيروق و بيصفا..
وبيصير فاضي البال
وبيلمع مرايي
بتمرق غيوم ل بالسما
متل السجر
بتصير تتمرّا
شي زغار
بيضِيعُو
بغنجة موجتو.. شي طوال
وكلما موسيقا الشوق
بتْشبْشِب
مابين ضفه وتانيه
بيلفّ جسْر من الخشب
عالخصر متل الشال
..
بيمشي
معبّى مي
ومحمّل قصص
شي بالشمس بيكون.. شي بالفي
وبيهز بالغربال..
بيسقي الورد والشوك
قلبو كبير..
ولمّا هل نْواعير
بتعنّ عامهلا.. بيبلّش يغنّي
وبيغصّ بالموّال
بيمشي
متل مرسال بين السما والأرض
آخ يامرسال
..
بيعرف بإنّو البحر مي ومالحه
بيركد
تيعمل خير
وبيكب حالو بالبحر
في ناس بيقولوا انتحر
وفي ناس
بيشوفو البحِر
سجْره كْبيري كْتير
وبيفكّرو إنّو النهر عرزال
وفي ناس متْل الزمان بيعرفو
إنّو النهوره حبال بتشدّ الأرض
غَلّه ع ضهْر الآلهه
هالطالعين بهالأبد
ياحبال شدّي عالأرض ياحبال
بعد كتابك الأول (بيتين وتنّور ) يللي خلانا نشهق من الدهشه وكتابك التاني (كرْم السما) يللي كان أطيب موسم للشعر، في شي جديد؟
إي كتابي التالت (مملكة الشتي ) جايي عن قريب.
لاحظنا إنو عملت أغاني السنه الماضيه وهيدا شي جديد، شو القصه؟
الكل عم يشكي من هبوط الفن وبالذات الغنيّه ومن أهم الأسباب برأيي إنو صارو المطربين والملحنين يألّفو كلمات لأغانيهن ..
وهيدا استخفاف بالفن وبالجمهور لأنو قلال للي بيعرفو أسرار الشعر .
كلمات الأغاني للي عملتها بتتعلّق ع خطوط النوته الموسيقيه متل فساتين الصبايا.. كلها دلع وغنج.
كيف علاقتك ببقية الشعرا؟
جميله جدا
واستفدت كتير من استشارات ونقاشات عملتها مع الشعرا الأساتذه علاء الدين عبدالمولى وبسام العنداري وعصام يوسف وابراهيم شحرور والحسين مخول وسليمان طراد ونبيل عزير. بحب وجه لهن شكر كبير.
كمان استفدت من ملاحظات الصحفيين الأساتذه علي عزير و تمام بركات وغيرهن.
آخر شي بتحب تقولو؟
بدي اتشكرك ع هالحوار.. بشوف حالي فيكي إنك من بلدي ومن أجمل صبايا الأرض.
وبقول لكل يللي رح يقرو هالحوار: بعرف بهالوقت الصعب مافي شي ممكن يخفف هالحزن الكبير بس نشالله هالحوار قدر يكبر ولو شوي مساحة الجمال بحياتكون.
