3

:: مقدّمة كتاب للشاعره والفنانه عُلا حسامو بمجلّة "الخوابي" عالفيس بوك - ::

   
 

التاريخ : 07/08/2014

الكاتب : إياد قحْوش   عدد القراءات : 2026

 


 

 


 

 

شو بيقربَك وجّي؟

وهيّي عالشطّ بتمدّ إجرها عالبحر وبترسم دويّره.. بيدوخ البحر..

وهيّي بالبحر بتكمش الميّ وبتشلحو بالهوا بيصير غيوم بيضا.. وبيطير.. مرّه بيرسم وطن مرّه عيله عم تنقّي حنطه.

..

ومرّات بتعربش ع سجره.. بيلحقوها الولاد تايسمعو صوتها؟ 

شو هيّي عصفور.!

إي إي يعني بتغنّي وصوتها بيسافر بهالسهول.. بيحمل ريحة الشعر وبيروح..

صوتها بيمرق ع الجبال متل الغطيطه.. في ناس بيفكّروه شي عروس مارقه وفي ناس بيقولو لاء هيدي "تلجة الأربعين"..

بيمرق صوتها ع الوديان.. بيعبّي الوديان نبيد.. عرفتو هلق ليش بيضل الصدى رايح جايي وعم ببيهزّ عالميلين متل السكرجيّه..!

..

الليل بيسمّيها شاعره

الطقس بيقول هيّي فنّانه

الوقت بعدو صافن.. بيقولو عم يقرا كتبها.

 

بيحكو عنها قصّه قال في سجره  كانت ع مفرق القيامه قالتلها اكتبيلي قصيده راحت جابت شلعة ولاد وصارت تلاعبهن..

تاني يوم اختفت السجره..

بس في صاحب مطبعه قلهن: السجره صارت ديوان إسمو "حيث لا أحد".

 

 

 

وبتكتب باللغه المحكيّه كمان.. بتكتب غناني وبتلحّنها وبتكتب شعر محكي.

..

في طفل قلّي كمان بتألف قصص للولاد وكل قصصها "لاقيه".. ماعرفت شو بيقصد لحتى عرفت إنّو بيلتغ بحرف الرّي.

..

علا حسامو بهالكتاب بتمشّط بسطورها جنّيّات الرّيح.. بتشوف صفحاتها متل الأرض المفلوحه بأول الشتي.. متل رفوف السنونو الراجع ع قرميد الكنايس القديمه..

..

عُلا الصبيّه الشاعره بتوقّف ع أعلى جبل وبتطلّع لفوق وبتقول

شو بيقربَك وجّي؟ 

..

عُلا حسامو

كتابك إنسان.. وإنتي كتاب.

 

 

 
   
 

التعليقات : 0

 

   
 

.