3

:: لقاء مع الدكتور إياد قحوش بمناسبة إصدار العدد الأول من مجلّة السايح الألكترونية للشعر باللغة المحكية والزجل ::

   
 

التاريخ : 19/04/2010

الكاتب : كميل عين الشايبة   عدد القراءات : 1932

 


 

 

 

o      شو هوّي الشعر؟

- مافينا نحدّد الشعر.. كل مالبّسناه طقم بيكبر عليه وبيشقشقو

 

 

o      شو الفرق بين اللغه الفصحى واللغه المحكيّه؟

 

- اللغه المحكيّه بتعربش معنا عالسجر وبتطلع عالجبال وبتسهر معنا بالشتويي
ومنشوفها مع الولاد عالبيادر ومع الفرحانين بالأعراس ومع المحزونين بالمقبره
أنا كل أحلامي باللغه المحكيّه
اللغه الفصحى بتعرّم عالورق

 

o      شو الغايه من تأسيس مجلة السايح؟

- الغلّه كبيره ومابيسوا نضلّ نضمّن الشعر باللغه المحكيّه لغيرنا

 

 

o      من وين إجا اسم المجله؟

- من السايح هالجبل الكبير ل بتشمّ ريحة السما من عندو وقاعد قعده عربيّه بنص وادينا
 

 

o      مين معكون بالمجله؟

- معنا غوّاصين كل ماشكّو ع سواحلنا بيرجعو بكمشة درر
 

 

o      هل المجله بتقتصر عالشعر باللغه المحكيّه وعالزجل؟

- شعر وزجل وقصص ودراسات عن الشعر باللغه المحكيّه وعن الزجل وعن الشعرا
 

o      شو بتحبّ تقول لشعرا اللغه الفصحى؟

- بقللهم في حلاوه ببعلبك وبغير بعلبك
الشعر باللغه المحكيّه تثقَّف ودار بلدان.. ونحنا عم نعجّقو بالصور وبالخيال وفتحنالو شبابيك عالفكر.
بشعرنا منحكي عن الخيال للي بينكسر، والصوت للي فيك تمسكو، والضو البتسمعو
نحنا فتنا عالموت وبحبشنا بخزانتو
مشينا بعكس الوقت
دوّرنا الأرض ع إصبع ولد زغير

 

o      مينا نحنا؟

- شلّه من الشعرا بيكتبو شعر اللغه المحكيّه والزجل داقو طعمة الملكوت وعم يحكو عنها
 

o      أكيد في صعوبات قدامكن.

- طريق المجد دائماً طلوع
 

o      منلاحظ إنكون عطيتو لقب للمجله ت تكون للشعر باللغه المحكيّه وللزجل. يعني فصلتو شعر اللغه المحكيه عن الزجل.

- الزجل بابو وسيع ومرحباني وفي ع عتبتو نضوة فرس
الشعر بابو ديّق بس سقفو عالي.. وقلال بيفوتو من الباب الديّق
 تيلاقو الملك
 

 

o      ومين هوّي الملك؟

- السرّ الكبير

 

o      بمين تأثرت من الشعرا؟

- بألله
 

 

o      ليش ألله شاعر؟

- ألله هوّي الشاعر الأكبر.. هوي شاعر الشتي والألوان والوقت والحلم
 

 

o      وشو أحلى قصيده لألله؟

- القيامه

 

 

o      بتآمن بالقيامه؟

- القيامه حلم للناس ل بتصلي.. بس للشاعر الكبير القيامه ذكرى
 

 

o      من أيمت بلّشت تكتب شعر؟

- من يوم المرق من حدّي الموت وجفّلني.. وبعدني جفلان
 

 

o      وأيمت بتكتب؟

- أنا ع طول عم أشعر ماعدا وقت البكون عم أكتب شعر
 

 

o      كيف يعني؟

- يعني الشاعر بتكون حواسو عم تعبّي طول الوقت
ووقت بيكتب بيفضّي من الخزّان
 

 

o      شو عمل فيك الشعر؟

- قدّسني
 
 

o      بتحكي عن المحبّه كتير شو إلها علاقه المحبّه بالشعر؟

- قللي صديقي الشاعر المشتاوي الكبير عصام يوسف.. وقت بتقول لحدا بحبّك كأنّك عم تقللو مارح تموت. المحبّه بتخلّد الشعر.
 

o      شو مهمتكم بهالمجلّه؟

- إنو نعبّر خيط الروح بإبرة الكلمه
 

 

o      وشو ناويين تعملو بالخيط؟

- يانغزل طقس صافي تانقدر نشوف الملايكه الشفّافه يا نلفّو كبكوبه بلكي بتصير كوكب جديد
 

o      ومين بتحب من الشعرا؟

- بحبّهن كلّهن لأنو المحبّة الحقيقية بتطلع من القلب مابتنفرض من برّا
 

o      كلمه أخيره

- بتشكّرك وبحب نوّه بجهود الأخوة جهاد ابراهيم و جورج حنا ( أبو اسبر) بإخراج مجلّة السايح وبشكر ضيعتي ووادينا يللي دايما بيشجعو الأعمال الثقافية الجميلة وبوجّه تحيّه لكل زملائي شعرا المجله من سوريا ولبنان.

 

 

 

* * * * * *

من قصيدة ملاك النّار

 

وجْوانحو صحرا

كأنْها غيوم

صفرا

وقت بتقوم.. نص القيامه عالدني بتقوم

ولمّا بيرفّو بالفضا

بتفكّرو

واقف عم يهوّي على منقل نجوم

*    

 

 


د. إيــاد قـحـوش

في سطور

طبيب في علم المخبر ونقل الدم من جامعات أمريكا ويعمل في مستشفى الملكة إليزابيت في هاليفاكس وبروفيسور مساعد في جامعة دالهاوزي و مدير بنك الدم في مقاطعة نوفاسكوشيا في كندا.

نشأ وترعرع في مرمريتا. متأهّل وله صبيان وبنت.

بيكتب الشعر باللغة المحكيّة ويعتبر من روّاد الشعرا للي أدخلو الفكر والفلسفه عالشعر المحكي وأسس مؤخرا مجلة السايح الألكترونية التي تصدر من موقع ضيعتنا مرمريتا

*

 

 

 

 

* كميل عين الشايبة مغترب مرمريتاوي مقيم في كندا

 

أجري اللقاء لموقع ضيعتنا مرمريتا




 

 

 
   
 

التعليقات : 8

.

11-06-2012 01:3

نعمان الترس

إنت مرجع و علم من أعلام المحكيّه .. ونحنا منفتخ ب يللي متلك


.

15-04-2012 10:3

amir-haddad@gmail.com

سمير حداد

من أجمل البيان في وهدة الوئام تعلوه مسرة وتتوجه قيام


.

26-12-2011 12:4

mariakallas7@hotmail.com

maria

كلام جميل ورائع ويبعث التفاؤل في التنفس !! ويسلم فمك وعقلك يا دكتور إياد !! ادامك الله بهذا العطاء


.

22-12-2011 11:2

marsaba82@hotmail.com

حنة مارسابا

الله يحميك دكتور إياد وتضل نور مشعشع عالدني كللاّ


.

31-07-2011 08:5

addmad55@yahoo.com

عدنان

شقفة من شقفات السايح..


.

27-03-2011 10:0

salomontrahotmail.comd

سليمان طراد

إنت أستاذ الكل يا دكتور وكلامك درر

 

 


.

21/04/2010

حنـّا نـور الحاجّ

كثيرًا كثيرًا استمتعتُ

حنـّا


.

20/04/2010

ميرفت سرحان

الطب والشعر اذ اجتمعا شفي القلب والجسد معا

نتمنى لك المزيد من الابداع والعطاء وهنيا لبلدك بك


 

   
 

.