3

:: غِنِّيـّتـَك - إلى الشاعر الدكتور إياد قحوش ::

   
 

التاريخ : 05/10/2009

الكاتب : سمير هلال   عدد القراءات : 834

 


 

غِنِّيـّتـَك

إلى الشاعر الدكتور إياد قحوش

سمير هلال

 

غنّيتّك للشاعر الأسمر

زفّت خريفو بلونها الأخضر

جيّش حنينو لحنها المعزوف

ع وتار قيثارات من مرمر

 

حقك معك تخرج عن المألوف  

تزرع  أقّل وتحصد الأكتر

بين السنابل وحدك البتشوف  

ضحكة رغيف الخبز بالبيدر

 

بالشعر صفّى متحفك معروف 

مليان  باللوحات والجوهر

 

وداعيك متل السايح الملهوف

مع كل كلمه وسطر بتصوّر

 

ولو ما ضفِتْ عَ الأبجديه حروف

لكن شعورك ضاف شي أكبر

تموّض على إيديك شغل الصوف

وبخّر حرير المسك والعنبر

شاعر من جفون المدى مذروف

دمعة  خلود وملحها سكّر

من وقت ما صار الفضى مكشوف

ترفرف ع وجه المي روح الرب

والناس تخلق والشعر يظهر.

 

رد على هدية الدكتور إياد

غنيّة

 

 

 

 
   
 

التعليقات : 8

.

08/10/2009

Eiad

ممنونك خيي هادي.. والشعر المعمّد بالمحبة كلام جوهري.

ونشالله نبقى عند حسن ظنك.

 


.

07/10/2009

هادي بشروئي

ولو ما ضفِتْ عَ الأبجديه حروف

لكن شعورك ضاف شي أكبر

**

لا ضرورة للإضافة، قالها الشاعر للشاعر، فسكننا الصمّت المدهش


.

06/10/2009

Eiad

خبرني الصديق الغالي حبيب حبيب إنو عم يواجه صعوبات تقنية بكتابة تعليقات لكن هوي معنا وعم يسكر ع قداح الشعر

تحية منو للجميع

وتحية من الجميع لإلو

إياد


.

06/10/2009

Eiad

ياالله ياسوزان ماأصفى قلبك
أحيان بقول كيف بلد فيه من أمثالك بعدو مفرفط ومابيقدر يلمّ حالو..

ياألله ماأحلى المحبة المجانية والجمال الروحي

و أنا بوعدكم إنو رح يبقى الشعر عم يلالي بهمة أخواتي الشعرا سمير وباسم وعصام وغيرهم

خلوكم عالخط


.

06/10/2009

Eiad

شكر متلّت إلك دكتورة نضال.. لأنو عم تخلّينا نعذّب الدكتور مفيد تايضلّ داير بالو ع جماليا،  ولأنو بتحبّي الشعر وبتتذوقي عناقيدو، كمان لأنك بتشجّعي الشعرا.

ع فكرة سمير خامة شعريي أصلية.. ورح نشوف أكتر نشالله

إياد


.

06/10/2009

الدكتورة نضال غريبة

أستاذ سمير..

السنابل والبيدر ورغيف الخبز العميضحك هني أحلى رموز الخير والحب.

انشالله كل أيامكن فياضة فيها، تتحفونا وتسعدونا بأروع الصور اللي منشوفا نحنا معكن كمان.

بيلبقلو للدكتور أياد أحلى الكلام.. تسلم  ايديك وعيونك أستاذ سمير

لك تقديري.

نضال.

 


.

06/10/2009

سوزان ضوّ صايغ

"معاً، خرجتما عن المألوف"

الغنيّة جابت غنيّة،

وطلع الضوّ على العالم بعالم جديد دستورو الكلمة اللي رسالتها المحبّة

التحدّي الوحيد اللي بيخلق منّو مواجهة سلميّة

بتخلق بالتالي أرض محايدة بيرتاحو فيها البشر،

هوي تحدّي الشعرا بالكلمة الخلاّقة.

دمتما معاً

ريشة تكتب وترسم عالماً آخر

يختاره القارئ دون خوف من هدر الوقت في قراءات بلا... وجهة.


.

06/10/2009

Eiad

ممنونك أستاذ سمير
إنت شاعر جميل وأنا بحبّك من القلب وبشوف حالي إني تعرفتك عليك

ونشالله تبقى جماليا تجمع كل الدّبيكه.

إنت من للّي بيعرفو يعزفو عالوتر السادس.. وتر الروح.

وتذكرنا كل ماشلحت نظرة بهالطلوع..

سما صيدنايا شفّافه وفيكُن تشوفو شو عم يصير فوق.

ونشالله منلتقي.


 

   
 

.