3

:: "مْهـاجـر" - هديي للأديب الشاعر إيلي مارون خليل ::

   
 

التاريخ : 25/08/2009

الكاتب : د. إياد قحوش   عدد القراءات : 1456

 


  

مْهـاجـر

هديي للأديب الشاعر إيلي مارون خليل

د. إياد قحوش


بيمدّ إيدو

عاسما الورقه

وبيشدّها

تايقطُف البرقه

وبيصبّها

بكاس السّهر أسرار

تايشربو

عند الصبح سرقه

وبيدوُر بالبحر

بيجي دواّر

وبتصير

روحو مْن التّعب زرقه

بيوقف ع باب المملكه

محتار

وضايع

مَ بين الفقر والفرقه

كيْف رح يفوت

بقصر والع نار

وكيْف رح بْيرجع

صوب بيت العمر

ومْراكبو عالشطّ محترقه 

 

 

 
   
 

التعليقات : 10

.

29/08/2009

Eiad

مراكبنا الجديدة يا حنان بيجوز ما تقبل تستقبلها مواني عتيقة.. صرنا طبخة عربيه بطعمه أجنبية..

ما بقيلنا غير نحلم ونتذكر.. تعبت وما عم لاقي حلّ

شكرا يا حنان لمرورك العذب..


.

29/08/2009

حنان

جميلة هالقصيدة يا حكيم..

قولك مافينا نعمل مراكب جديدة غير اللي عالشط محروقة؟؟

مافينا ناخد القرار ونبطّل حيرة؟؟

عمبسأل حالي هالأسئلة ياترى القرار بأيد مين!!


.

26/08/2009

Eiad

عن قريب يا دكتورتنا الغاليه نضال بتصيري تكتبي شعر..

الغربه بتفتح جروح.. بس بهالأيام صار لابدّ منها


شكرا لتعليقك الجميل

 وسلام للجميع

 


.

26/08/2009

Eiad

يا هادي

النظر بيشفي أحيانا
إنك تشوف الجبال يللي طلعتها والوديان يللي نزلتها.. هيدا دوا

نحنا منحلم فيّا.. والحلم مخدّر بس ما بيشفي

لوهالبلاد هونيك بتظبط شوي  منرتاح

بس يمكن غصن ل بينكسر.. مارح يسوّي

بتشكرك من القلب لتفاعلك واهتمامك

 


.

26/08/2009

Eiad

يا سوزان

هالمراكب بتطلع مكدّسه من شطوطنا.. وبترجع فاضيه.

بيحزّني كتير إنو شوف متلي ناس عم تنشمط من هالبلاد وتتغرّب.. وكلّن بيقولو مافي أمل.. وفي طوفان جايي ياع إيامنا ياع إيام ولادنا.

تذكّرت قصه.. مرّه كنت بحفلة راس سنة بكولمبس أوهايو وبآخر السهره دخل رجل ختيار وصار يتلفت يمين و شمال.. وبعدين نقّاني وإجا قللي هيدي حفلة اللبنانيينن والسوريين.. قلتلو إي.. قام قللي أنا أهلي من هونيك وإسمي مطانيوس داوود.. كنت مع إمي وبيي بسفينة التيتانيك.. بيي غرق.. وأنا وأمي بقينا.. وجينا ع هالبلاد.. وإمي تعذبت كتير.. وبعدين ماتت وأنا زغير. وأنا ربيت أميركي.. بس هلق أنا بالتمانينات من عمري وحابب أعرف سر هالأم العظيمة من خلال معرفتي بالجالية.. قللي إمو كانت تحسسو إنو هونيك الجنه.. بس ماتت بكير.. بعتقد لازم صللّي بكنيستكن.. بلكي بروح لمطرح ماراحت إمي..لأنو ما عاد فيي روح وشوف بلاد إمي عالأرض.

 


.

26/08/2009

Eiad

خيي إيلي

سقفك عالي، وبالسقف معلّق رمان الفضيلة.
وخيول حكمك بتركد ع شط الوقت.. ولأنها بسرعة الزمن ما بتتغيّر

انشالله بتكون بخير وين ما بتروح. بس يمكن لبنان بحاجه لأمثالك أكتر تا ما يهبّط

إياد

 


.

26/08/2009

د. نضال غريبة

كلماتك دايماً حلوة وشفافة، وكتير بتلبق للأستاذ الشاعر الرقيق إيلي.

تسلم ايديك.

كل التقدير والمحبة لك وللعائلة.

نضال غريبة - ملبورن


.

26/08/2009

هادي بشروي

وضايع

مَ بين الفقر والفرقه

ألسنا نتغرّب جميعنا يا دكتور إياد بحثاً عن الهروب من الفقر وعلى أمل محو بؤس المجتمعات التي ترفض الخروج من قوقعتها؟

لماذا إذن وبعد أن نهاجر، لا يهجرنا الإحساس بالغربة؟

قصيدة جميلة جداً من روح جميلة وقلم أجمل ولمن يستحقها

تقديري


.

26/08/2009

سوزان

إياد

من الوف السنين، عملوا مراكبهن من خشب أرز لبنان وسافروا ع العالم ومش عارفين شو ناطرن فيه

اليوم، منعرف شو ناطرنا بكل العالم، والأرز بعدو شامخ، ومن خشبو رح نبني، إيد بإيد، قوافل سفن ترجّعكن يا مهاجرين على ضياعكن.

هيّوا حالكن، عنّا شغل كتير، مش عم تقول المراكب محروقة؟!

**

تحيّة للأستاذ إيلي الذي هو أيضاً إنسان بحق، بقلبه ولسانه


.

25/08/2009

إيلي

أشكر عاطفتك، الدكتور الشّاعر إياد قحوش. وأتمنّى أن تستمرّ معطاء في مجالاتك كلِّها، فأنتَ تعرف أنّ الإنسان "بأصغرَيه" شرط أن يكونا متميِّزَين بمثل ما به تمتازون.

سلام ومحبّة من كاليفورنيا (حيث أنا في زيارة ابني)..

ومن لبنان لأنّي عائد حتماً، بعد انتهاء الإجازة

 


 

   
 

.