|
النـّـوم
(هدية محبّة للفنان الشاعر جوزف أبي ضاهر)
إياد قحوش
النّوم .. موتِه فاشله
وهيّي
عم تنخلق
بتموت بِبّـيّي
متل الشَّكَل
حسْكه بمحّايي
وعبّى الورق
بحْروف ممحيّي
النوم
تقْل العتْم..
بردايي
بتنزل عَلى شْبابيك
مطفيّي
وبيصير
سطح اللاوعي
مْرايي
بينطّ منها ألف جنيّي
أوّل مَ آدم نام..
الحْكايي
بتقول
نام بْفيّ الخْطِيّي
ومن يومها
صار في إلو نْهايي
معلَّقه بحْبال سريّي
النوم مش غايي
إلو غايي
وتاتعرفو الغايي الحقيقيّي
النومه الطويله عالأرض
جايي
ومنشان ماتستغربو بكرا
عالأرض نامو شوي
يوميّي
|
