|
- حلق للشمس ؟؟؟ وِبلالي !
- هلال بعدو .. ع َ قدّ الحال ؟؟؟
- الكواكب طفال .. وعم يلعبو بالجو ويركدو شمالي ؟؟؟
- الهلال انبل بقلب هالة؟؟
- الهلال عيّط وبصابيعو خيّط؟؟؟
- ألوان سرحت شال
- حطّ الشتي تحتها زيح؟؟؟
- لا ضهر ختيارة عم يصلّي!!!
- وفعلا مش أكتر من خيال ضوّو انعكس من مملكه لَ (سراج فعّالة).
إحساسي بهالصور المغزولة بخيطان محبّتك ووفاءك رح أوصفوع طريقتي.
يمكن الصدفة إلا دور.
إيّاد من أربع تيام أنا وجايي من المشتى، تركت ضيعة عين الريحانة ورايي ونزلت بالنزلة بالمنطقة اللي فيّا ريحان كتير، لمَحت الشال عم يسرح من الشرق عَ (حب نمرة) ضيعة العزيز الدكتور مفيد مسّوح.
كلّ اللي قدرت أعملو هوي أنو أنزل من السيارة وصوّر الشال هدول الصور.
يمكن أنت من عندك كنت بين الكواكب وشفتني مسحور وملّبك كتبت عنّي قصيدة..
منظر صحيح خيال.. بس منْنّتظرو من السنة للسنة، مرّات بيسرح سرقة وما منشوفو وبيهرب لسنة الجايي، بس وقت اللي منشوفو قدّ ما نكون زعلانين منحسّ بالفرح من جوّا.
إيّاد هون الدني جنبنا ومفردات الشعر بقلب عيونّا بس ماعم نعرف نرسما.
أنت .. هييِّ صوَر بخيالك من الماضي عم ترسما أكتر من شوفة العيون.
_ نعم يا إيّاد إسمو (ضوّ الفعالة) وما أجمل ها الأسم، وقدّيش بيسحبنا للذكريات الحلوة؟؟ وكمان وأسمو (ضوّ الشغّيلة) وقدّيش حلو هالأسم كمان بس كل عمري أسأل ليش أسمو هيك؟ أسألّي صاحبك.
وأنا كيف بدّي حطّ خط تحت الأسامي الحلوة؟؟؟
الكمبيوتر آخد المهمة وعم يرفض التراث، متل مارفض كلشي ألو علاقة برجفة الإيد والأحساس وتآمرو هوي والمكنات ع اللي اخترعن وأوّلن الخطّ، واللي اخترعون هلّق عم يضحكو فرحانين، بس رح يجي يوم يضحك الكمبيوتر عليّن وعنّن، وشو بيبقى للشعر مطرح ومين بدّو يضلّ يشحَط تحت الصّح والغلط ومين بدّو يشوف سرْحَت الشال. وضهر الختيارة عم تصلّي؟؟
كلّن عم يضحكو ويتسلّو (بالنكْلة) ويهدّو ويعبّو هالأخضر بشوالات ويرْجعولنا بخبار هالأزمات، وتحملّو يابشر سكراتن.
إياد أنت عم تعبّي للكمبيوتر قراص إحساس، بلكي بكون أمين أكتر من اللي عم يخرّبو هالطبيعة ويهدّو البيوت ع ضوّ الفعالة.
ـــــــــــــــــــــــــــــــــــــــــ
أنا وعم أكتب يا إياد شخّط كتير الكمبيوتر تحت الكلمات بالأحمر وكمان وقت اللي بكتب عن الرحابنة وفيروز قال: غلَط ولولاهن ممكن وصّلك الفكرة.. بس مابوصلّك أهمّ شي بهالكون تعلّمناه هوّي (الإحساس) اللي عمل منّك شاعر عم يكزدر بين الكواكب. |
