3

:: الأخوين رحباني - هدية لصديقي القديم كميل ::

   
 

التاريخ : 13/02/2009

الكاتب : د. إياد قحوش   عدد القراءات : 1423

 


  

الأخوين رحباني

هديي لرفيقي من أربعين سنه .. كميل

د. إياد قحوش

 

 

قللي القمر:

مرّه .. ببستاني

اطلّعت .. شفت الجوّ

 رحباني

وبيّن جبل من ضو

حدُّو جسر

حدُّو عم يضوّي جبل تاني

متل الكأنهم جانحين

بنسر

عاكتر ما رفّ بفضا لبنان

صار الفضا

شروال لبناني

 

 
   
 

التعليقات : 18

.

14/02/2009

Eiad

ياليلى

عملو عيد للعزّابي و جسر للقمر وحطو ناطورة للياسمين..
الرحابنة قصقصو ورق ع أسامي الناس
كرم العلالي عندهم صار يسوّي أساور..
الرحابنة ملوك ماحدا فيه يهزهز عروشهم.. لأنهم قعدو عالأرض.. مطرح ماكانت السما قريبه

هلا ليلى


.

14/02/2009

Eiad

سلام ياسلام

نحنا منحكي عن الرحابنة تانطهّر الحكي..
الرحابنة بعد سبع تيام الخلق ضمنو شقفه من الأرض وصارو يشتغلو فيها..

الله انبسط كتير ونحنا عرفنا إنو هالشرق ماوقّف ينقل رسايل جايي من فوق

.

14/02/2009

Eiad

ياندرة

في شوية ولاد عم يعربشو ع السجر.. بكرا بيوقاعو والسجر بيبقى..

ولبنان بيرجع وبيضل.. وهني بيصيرو بالقبور المجصصه

شكرا لتعليقك الزجلي


.

13/02/2009

Eiad

ياحبيب

أغاني وفن الرحابنة أطيب مع الطبيعه.. أو إذا بدك الطبيعه أحلى معهم..

لأنهم كانو وبقيو الطبيعه الطبيعيه والإنسان الإنساني

كل المحبة أيها الرحباني الخط


.

13/02/2009

Eiad

الرحابنة ياحنا كبرّو مساحة الإحساس عند شعوب بكاملها

شكراً لبلاغتك

 


.

13/02/2009

Eiad

ياهادي إذا ما منعيّش الكبار بقلوبنا بتيبس قلوبنا
وإذا ما حكينا عنهم بيتمرد علينا السمع.. وبيطق الصوت..

قديش بينقهرو السياسيين وقت بيشوفونا متعلقين بفيروز يللي مابتحكي سياسه!

.

13/02/2009

Eiad

بتذكر ياجولييت برنامج (مرحباً ياصباح) يللي كان يطلع الصبح.. كان كلّو أغاني لفيروز وكانت تقدمو نجاة الجمّ..
ما بفتكر الصبح بيطلع بسوريا ولبنان إذا ماغنّتلو فيروز.. وشوفي بالإيام الكترت فيها الغيوم السودا عالحدود بقيت فيروز تشقّ الغيم وتحمل رسايل ضوّ وجمال وظروف معبايي محبه.


.

13/02/2009

Eiad

يا سوزان كان لازم ينكسو الأعلام من المحيط للخليج ع غياب منصور.. لأنو قلال يللي بيرفعو العلم بشرف، ومنصور واحد منهم. منصور وعاصي فاتو بالسر.. لأنهن كانو جزء منو.. سر جمال هالشرق الحزين.

****

سهرانين تا يطلع غبار طلع الياسمينه

 


.

13/02/2009

Eiad

 بتذكّر السهرات عندكم يا كميل بين صفّين الزهور وع صوت سقسقة المي والمرحوم بيّك عم يسمعنا عتابا ويحكيلنا قصص.. وما بنسى فضل خيك طلال، الشاعر الكبي،ر يللي علّمني إشيا كتيره عن الأوزان والقوافي.. وعن البريي والصيد والعصافير..
بيتكم كان بيتنا كمان.. ومن تمان وتلاتين سنه ونحنا سوا بالضيعه وبالشام وبالغربه

كل المحبه إلك يا خي عن حق

 


.

13/02/2009

ليلى الأمين

د. إيـاد

كم من مرّة وبدون أن نترك منازلنا، سهرنا في ساحات الضيعة مع الأخوين رحباني؟

في تلك الساحات التي امتدّت على مساحة الوطن لتنتشر في العالم، تعلّمنا المحبّة والوفاء والولاء

صداقتك مع المهدى إليه، أو محبتك المتلألئة في كلمات قصائدك تظهر عمق تأثُّرك بمدرسة الرحابنة

دمت وفياً للصداقة والجيرة

 


.

13/02/2009

سلام

بهالايام صارت كلمة مدرسي بتضحك كتير

لهيك ما رح قول هني تركو مدرسة لاء

هني عمرولنا عالم من الجمال وتركولنا لغة هالجمال وابجديتو وقواميسه لنتعلم منن

ونمشي على نفس الطريق

ووفاءً لعالم الجمال الي اهدونا اياه لازم نعرف كيف نخليه عايش فينا

وشكرا لكل الي كتب كلمة وفاء لعالم الجمال

عالم فيروز او عالم الرحابنة

 


.

13/02/2009

ندره . ع . يازجي

يا ريتْ كلّ الناس بِ لبنانْ

يشوفو اللي شافو هالقمر

وتعود تفضى قْلوب ملياني

تـا يرجَعو، ويرجّعو لبنان

أخضر ..حلو..

فتّان

يضحكْ إلو

يفرح إلو

من بعد غصّا وقهرْ

ع َبلوتو

الاخوان رحباني

 

أطيب التحيات للصديقين إياد وكميل

 


.

13/02/2009

حبيب حبيب

إياد

بآخر حديث قلتلي: حبيب بس تديق خلاقك روح حوّش بلّوط

البلوطة بتهر عالسطح وعالدار 

مرّة الولاد قال شو هيدا خشب؟

 غريبة الدنيا.. الوصفة جنبنا وأنت شايفا وعايشا من عندك.

روحة البلوط والتغريقة وريحة السنديان هدول مرايتنا وبقلبن صار عش الرحابنة اللي فرّخ نسورا

وفن وتلاميذ الجمال شعراء متلك ويمكن وقت اللي بيهدي هيك هدية شاعر

 أكيد بكون اللي انهدا كميل وصديق وشاعر

إجت من حظّك يا كميل

عبّي جيابك كميل

ناطرينك حدّ الصوبيا

قديش نحنا منحبكن يا رحابنة ؟؟؟

 


.

13/02/2009

حـنـّا نـور الحـاجّ

أخي في الرحابنة، العزيز إياد

دمتَ رحبانـيـًّا رحبـًا بانيـًا للجَمال صانعًا للدهشة.

 

مودّتي من عبلـّين

حنـّا

 


.

13/02/2009

هادي بشروئي

بكلمتك وقصائدك

ضفت على جبال لبنان أضواء أخرى

ما أجمل الصداقة حين تستفزنا لنحوّل الكلمة إلى قصيدة، والقصيدة تصير جبلاً

رائع يا دكتور

 


.

13/02/2009

جولييت بدر

بظن اللبنانيين والسوريين وعيوا ع صوت فيروز وإبداع الرحابنة

كل البيوت وخاصة أهل القرى حسوا انو الرحابنة بيحكوا عنّن

عن بيتهن،  حقولهن، شمسهن، قمرهن.

وانغرزت فيروز بذاكرتهن وصارت رفيقة درب

وبلشوا يورثوا ولادهن هالحب

ألف ألف شكر الك دكتور إياد يا مؤرخ الجمال وساعات الحب الإلهية

مودتي بحجم صوت فيروز وعبقرية الرحابنة

 


.

13/02/2009

سوزان ضوّ

بين الجبال المضوايي وعم تجنح ع النسر

والفضا يللي صار أصغر من الكلمة،

بتطلّ من غربتك،

بتجمع الحروف، بتسكبها بمحبّة، وبِتِْلفها بعنوان: هدية.

شكراً إياد لأنّك حوّلت الصفحات إلى حقول أسماء تنتظر هديّتها في العيد.

أليس العيد كلمة؟؟؟

دمت مبدعاً بصدق، وصادقاً بإبداع.

 


.

13/02/2009

كميل

اخي وصديقي اياد

هديه ولا كل الهدايا، أولا منك إنت يابحر من الوفاء، وثانياً هديه رحبانيه، فحدِّث بلا حرج، رجعت بي الآن من كندا إلى مشوار ضيعتنا في سكون الليل وصفاء السماء، وضوء القمر، عندما كنا (نفصفص) إن جاز التعبير، أشعار وكلمات عاصي ومنصور مندهشين من سحر الكلام وبساطته ومعانيه، وأتذكر الآن كلمات:

سوا ربينا سوا مشينا وسوا قضينا ليالينا

ودخلك يا طير الوروار

وهوني السما قريبي بتسمعنا يا حبيبي

شكرا

 


 

   
 

.