3

:: عيد ميلاد شيماء ::

   
 

التاريخ : 10/01/2016

الكاتب : د. أحمد الخميسي   عدد القراءات : 926

 


 

 

إلى شيماء الصباغ شهيدة الورود المصرية

 

 

وقف التاريخ يفرّ في الأسماء

ودفاتر بلا حدود

ولما الدم فاض على الوجود

اختار "شيماء"

لما شاف الخطوة.. كبرياء..

والعين بتضوي بالفداء  

وبين إيديها الورود

وعلى لسانها النداء ..

اختار "شيماء"،

لما شاف البارود

وقبضتها الصغيرة

زي الرعود

بتشقّ الفضاء 

وحيدة .. نحيفة

لكن مخيفة

لأقوى الجنود  

ولما السما اكفهرت

والرصاصة استمرت 

حتى صدرها ..

وغطت البلوزة بالدماء،  

وقف التاريخ

واختار "شيماء"

يحفر اسمها  

جوه مجرى الدماء،

وبين الضلوع

زيّ السطوع

وزيّ لحظة ما لهاش رجوع،

زيّ كبرياء أعلى من الخضوع

زيّ أجمل الأسماء

زيّ انحسار طعم المرار

والورد لما يفوح

والبارود لما يروح

يهدّ في الطغيان جدار

زيّ اندفاع مليون دراع فوق المظاهرة

زيّ الشعور بالقهرة ..

زيّ كلامنا اللي بنكرره

وحبنا اللي بنصبره ..

وقلبنا اللي عمرنا ما نغيره ..

زي الشراع اللي انكسر ..

والحلم اللي لازم ينتصر   

وانت ماشية

بين إيديك الورود

فاتحة صدرك للبارود

وفاتحة في الظلمة أمل ..

وعمل ..

زيّ برق من الوعود

ساعتها وقف التاريخ

وفرّ في الأسماء

ودفاتر بلا حدود

ولما الدم فاض على الوجود

اختار "شيماء".

أحمد الخميسي. كاتب مصري

 

 

 
   
 

التعليقات : 0

 

   
 

.