فيروز - طليع حمدان

صوره وْهويِّه ودفتر 

وعنوان

ومأمور يكتب والورق عطشان

بيجوز فيهن 

ع الحدود تْجوز

لكن ما فيهن يعملوا إنسان

لبنان 

بِصوت العدل بيفوز

مش بالصور

بالبيت والدكان

من كثر ما صفّى صُوَر 

مدروز

فزعنا علينا يهبّطوا الحيطان

لبنان 

يا أصوات ليلى وروز

وجيران راحو يعزمو جيران

لبنان 

فيروز الْعطِتنا كْنوز

هالجوهره الحِنْيتْ لها التيجان

هالقدّ يا فيروز 

ما بيجوز

عنا تصيري 

بْعَتْمِة النّسيان

صوتِك إلو تكريم ما بيعوز

بل مثلك بْيتكرّمو 

الأوطان

يا كمّ زنبق بالنّدي مدروز

عا لحن صوتك 

نسّلُو الخيطان

يا خبز روحي 

عالطّهر مخبوز

منّو طَعم كون وبقي 

جوعان

يا صوت لوّحلو عنب تموز

يا صيف دافي 

يا شتي ألحان

بيحبّك الرمان.. زهر وكوز 

صوتك لأنّو 

فقفقة رمان

بحمل لأجلك مسبحة فيروز

بتغار مني 

مسبحة مرجان

انت مثل لبنان يا فيروز

لبنان تاني مْنين رح يخلق

ومثلك مْنين بْيخلق بلبنان

*

*

فيروز صوتك - إياد قحْوش

صوتِك عصير الرّيح 

بالوديان 

بْيِطْلع غْطَيطَه

عاجبل لبنان 

بِتْزَرِنْقو تَلْجه

بْتِمْحي الزّيح 

لْ بَين الْبِكي 

وْمِنْجَيرْة الرّعْيان

..

صوتِكْ .. مسيح 

قْيامْتو 

تِلْميح 

بْتِمْرُق شَبَح بِمْرايْة العِمْيان 

وْلَوحِة سفر

عِرْقِت مِنِ التّلْويح 

عالشّط 

حتى تْشَرْدْقو الألوان

..

الضّو لْ بِصَوتِك 

سِنْديان

وْشيح

طِلْعوا بِصَحرا سْكوت

والألحان 

بْنَهْر الحكي

بِتْغرّق مْراجيح 

بْتِحْرُق عَتِم 

بِتْبَورْدو بستان 

وْمتل للّي نازل بالبرق

تِقْديح 

والغيم بيْعبّي السّما دخّان

..

صوتِك 

الميّ

مْن الأرض بتْصيح 

نَبْعِةْ شِعر

بِتْشَقلِب حْكايات

بِتْغِلّ متل الرّوح بالانسان.