3

:: حوار مع شاعر الضو الدكتور إياد قحْوش ::

   
 

التاريخ : 23/07/2014

الكاتب : سالي غنوم   عدد القراءات : 1960

 


مع صدور كتابه الثاني بشعر اللغه المحكيّه

"كَرْم السّما"

حوار مع شاعر الضو الدكتور إياد قحْوش

حاورته الفنانة سالي غنوم

 

 

 

 

١-كيف بتعرّف الشعر للي بتكتبو؟

اللغه هيّي كلمات بتمرق من حدّ بعضها في سياق الحكي.. الشاعر بيظبّط مواعيد بين هالكلمات وبسّ تشعَل شراره بيكون خلق الشعر.

هالموعد بين الكلمات أحلى من الصدفه.. وفيه فرح اللقيّه.

 

٢- يعني الشعر  هوّي حكي؟

الحكي تراب.. المعنى من الحكي هوّي الروح والشعر هوّي جسد وروح.

 

٣-كيف بيجي المعنى؟

من دفتر المبيضّه تبع الله.. لأنو يمكن هالدني هيّي المسودّه.

 

٤- قبل ما نحكي عن كتابك شو أكتر شي بيهمّك بس تطبع كتاب؟

بيهمني وأنا عم إنشر شعر باللغه المحكيّه ما أخسر شعبيّة الزجل بس كمان ما اتنازل عن كون الشعر المحكي أدب .

 

٥-كتابك الأول بيتين وتنّور لاقى نجاح كبير بسوريا ولبنان.   شو انطباعك عن هالنجاح؟

بالرغم من ظروف البلاد بحب قول إنو كتاب بيتين وتنّور نجح لأنّو الكلمه أقوى من الرصاصه.. ولأنّو عاصمة الشعر المحكي بسوريا ولبنان مشتى الحلو احتفلت فيه وبريعو اشترت خبز للولاد الفقرا .

 

٦- شو بيختلف كتابك الجديد "كرْم السما" عن كتابك الأول بيتين وتنّور؟

الكتابين كمشتين حنطه من بيدر الجمال.. بالنهايي طعمة الخبز هيّي نفسها .

 

٧- شو العنوان العريض لكتابك كرم السما؟

عنقود أمل .. بجاط خَيبه.

 

٨- شوالفرق بينك وبين حالك كشاعر مبارح واليوم وبكرا؟

أنا بفتكر الشاعر بيكتب قصيده وحده ع مراحل عمرو.. في دراج وبواب وطرقات بدو يقطعها وفي إيام شتي وصحو.. بس كل شعري بالأخير بيدقّ بالأسئله الكبيري: الإنسان والحياة والموت والزمان .

 


٩- قدمت بكتابك الجديد كرْم السما قصايد أطول مْن اللّي نشرتها بكتابك بيتين وتنور. شو المقصود من هالتغيير؟

الشعر ما بيتقيّم بالكتره.. الشعر تقييمو بيكون ع أساس قوّة الكهربا اللّي فيه.. القصيده ممكن تكون طويله وعباره عن كمشة لولو.. بسّ تكون القصيده مشدوده متل الوتر ما بيهمّ تكون وتر ربابه أو وتر كنترباص المهم الموسيقا تكون حلوي.

 

 

١٠- بيقولولك "شاعر الضو" وإنت بتحكي كتير عن مملكة الضو.. شو هوّي شعر الضو؟

شعر الضو شعر منقّى.. والمملكه عمّرناها من حجار كريمه.. قصورها مسكونه بجنيّات الخيال.. وفيها جنينات فلت.

 شعر الضو هوّي الشعر البيضلّ جديد وما بيتشبّه غير بالحريّه..

 

١١- مقدمة الكتاب كتبها الشاعر والفنان الكبير جوزف أبي ضاهر.. وحكي عنّك وعن شعرك بإعجاب شديد. شوتعليقك؟

صحيح أنا محظوظ بمحبة الشاعر والأديب الكبير هنري زغيب يللّي كتبلي مقدمة كتابي الأول بيتين وتنور.. وهلّق بكتاب "كرْم السّما" الشاعر والفنان والإنسان الجميل جدا جوزف أبي ضاهر تكرّم عليّي بمقدمه يمكن أحلى من الكتاب.

ولوحة الغلاف للفنانه الحمصيّه ربى بطيخ عازار.

 

١٢-رح تعمل توقيع لكرْم السما؟

لاء .. بعتذر ما رح إعمل توقيع.. بعد ما عملت دعايي وراح عدد كبير من الكتاب. اللّي بقيو رح ينباعو تَ يكونو تبرُّع لمساعدة الكلمه تاتبقى متل سهم النار بليل الظلم والظلام.

 

١٣- حابّه إسألك عن غنيّه غنالك ياها الفنان ميشيل أيوب وقصيده ألقاها الفنان زاهر عساف. شو رأيك بهالتجربتين؟

 

ميشيل أيوب فنان بيعزف ع عدة آلات موسيقيه ومطرب جميل.. تفاجأت بموهبة التلحين عندو.

طبعا بفتكر كان العمل ناجح وصوت ميشيل ولحنو حملو الكلمه معهن لبعيد وغنية "دعسات إمي" طالعه من قلبي ومن قلبو.

 

غنّيّة دعسات أمي

https://www.youtube.com/watch?v=QrIvWxHGnHU

 

وزاهر عساف كمان فنان راقي جدا وعازف موسيقي ومطرب وملحن وطلع بفكرة إلقاء قصيدة "وإمي عم تنقّي عدس" وكان ناجح جدا الإلقاء والموسيقا الخلفيه كتير كانت مناسبه.

وإمّي عم تنقّي عدس

https://www.youtube.com/watch?v=e0MsSR8c-1M

 

 

١٤-منرجع ع كرْم السما وين متوفّر الكتاب؟

الكتاب صار موجود بمكتبات بسوريا وبلبنان.. وقريبا ع الفيس بوك رح حطّ التفاصيل مع أسامي المكتبات.

 

١٥- شكرا ع الحوار المفيد والمهم.. وياريت تنقّيلنا قطعه نختم فيها الحوار.

 

شكرا إلك قطعه عنوانها

بعدين

 

بْهالغيمتين البِيض

ل نشّفتهن بالليل عاضوّ القمر

وعلّقتهن عالرّيح

عم إمسَح قْزاز السما

تاشوف

باب الغياب منيح

تعبْت وأنا عم جرّب مفاتيح

***

 

 

الفنانه سالي غنّوم

 

 

 

 
   
 

التعليقات : 0

 

   
 

.