3

:: فرع طرطوس لـ"جمعية عاديات حلب" يقيم احتفالاً لتوقيع كتاب "بيتين وتنور" للدكتور إياد قحوش ::

   
 

التاريخ : 12/04/2014

الكاتب : جماليا   عدد القراءات : 2073

 


 

 

احتفلت جمعية عاديات حلب فرع طرطوس في ٢٥ آذار -٢٠١٤ بتوقيع كتاب "بيتين وتنور" للدكتور إياد قحوش.

 

وقد قرأ شعراء وشاعرات من سوريا في الأمسية  قصائدَ باللغة المحكية اشتهرت للدكتور قحوش. وقد أبدع  الشاعر المشتاوي عصام يوسف في إلقاء قصيدتي "فيروز الصوت" و"فرس الشام" .

 

 

التسجيل الصّوتي

إليكم نصّ القصيدتين وتسجيلاً بالصوت والصورة مع تمنياتنا للجميع بدقائق ممتعة مع شاعر الضيعة والكلمة الصادقة الدكتور إياد قحوش:

 

فيروز صوتك


صوتِك عصير الرّيح
بالوديان
بْيِطْلع غْطَيطَه
عاجبل لبنان
بِتْزَرِنْقو تَلْجه
بْتِمْحي الزّيح
لْ بَين الْبِكي
وْمِنْجَيرْة الرّعْيان
..

صوتِكْ .. مسيح
قْيامْتو
تِلْميح
بْتِمْرُق شَبَح بِمْرايْة العِمْيان
وْلَوحِة سفر
عِرْقِت مِنِ التّلْويح
عالشّط
حتى تْشِرْدْقو الألوان
..

الضّو لْ بِصَوتِك
سِنْديان
وْشيح
طِلْعوا بِصَحرا سْكوت
والألحان
بْنَهْر الحكي
بِتْغرّق مْراجيح
بْتِحْرُق عَتِم
بِتْبَورْدو بستان
وْمتل للّي نازل بالبرق
تِقْديح
والغيم بيْعبّي السّما دخّان
..
صوتِك
الميّ
مْن الأرض بتْصيح
نَبْعِةْ شِعر
بِتْشَقلِب حْكايات
بِتْغِلّ متل الرّوح بالانسان


       ***

 

فـرس الشّــام

سْبَقْت السّهم
والضّو عن سرجي
بْيوقـاع درْجِه .. بشِقـْلو درْجِه
وطـاير أنا
والصّوت خلفي
خْيال لمعة الماس
بعين جوهرْجي
..

والكون فنجان انْقلب
والهال
نْجوم قِرْيِت للزمن برْجي
وْمِن كِتِر
ماطْبَعْت الصّحاري نْعـال
صار الرّمل
للرّيح كِنْدرجي
..

خْزَقت البرد
تالغيم صفَّا شال
يْنَسِّل شتي عَ كْتاف مِعْمَرجي
وْنَفنَف صَهيلي
عَ الأرض تمثال
يْبُوس التّراب بْساحة المرجه
..

وصار الدّهر خيل.. وأنا خيّال
قارص لِجامو
ومابْيِسْتَرجي
يْخبّي بصندوق الحياة
جْبـال
رَفْعِت سماها فوق سَطح الوقت
قلعة أبدْ
صندوق للفرجه

*

 

 

 
   
 

التعليقات : 0

 

   
 

.