3

:: حوار مع "شاعر الضّو" الدكتور إياد قحْوش عن كتابو "بيتين وتنّور".. كتاب شعر باللغه المحكيّه ::

   
 

التاريخ : 25/11/2013

الكاتب : خاص – جماليا   عدد القراءات : 2753

 


 

عِمِل الحوار الشاعر المنبري الكبير روكز خليل روكز رئيس جوقة خليل روكز للزجل

 

 

لأنّو طلع كتابك وكنّا ناطرينو.. ولأنّو هيدا أول كتاب إلك حبّيت إلتقي معك وندردش عن الشعر باللغه المحكيّه وعن كتاب "بيتين وتنّور" .

 

*   أوساط الشعر باللغه المحكيّه قالو إنّو هالكتاب مهمّ.. ونحنا منعرف إنّك بتكتب شعر مْدهّب، ليش طبعت هالكتاب هلّق بعزّ هالنيران بالبلاد؟

·       الكلمه كانت من البدء سمعها الإنسان ونسيها.. رجع تيتذكّرها طلع معو شعر.. يعني الشعر إيد من السّما بتلحمس ع صنديحة الإنسان والإنسان بيحتاج هاللحمسه بأوقات المرض أكتر.

 

*   وليش بلبنان.. مع إنّو لبنان بلدك وانبسطنا كتير فيه؟

·       لأنّو لبنان حجر زاويه.. كل ماهبّط  هالشرق منرجع نعمّرو ع هالحجر

 

 

*   إسم الكتاب "بيتين وتنّور".. كأنّو كتاب لبناني.. كيف نقّيت هالإسم؟

·       بيتين وتنّور يعني ضيعه مكوكعه ع بعضا ودفيانه بالمحبّه

هالضيعه ممكن تكون بالمتن بلبنان ممكن بالوادي بسوريا

مطرح ماكانت تنكتب الأساطير وقت يمرقو الآلهه بين هالجبال

بيتين وتنّور.. قصايد متل جاره بتستعير من جارتها رغيفين خبز.. متل روبه زغيري بتروّب نص حليب الضيعه.. متل ديك واحد بيفيّق ميّة فلاح.

 

*   ليش بتكتب باللغه المحكيّه؟

·       لأنّو اللغه المحكيّه متل حبّة الرّمان بين شفاف صبيّه.. مابتقدر تميّزهن عن بعض

 

*   كيف يعني؟

·       يعني بتسمع الشعر المحكي بتفكّرو إنتي

بتقراه بتشوف خيالك

بتلمّسو بتشمّ ريحة صوت قلبك عم يدقّ متل جرس الأحد

  

*   شو أضفت للشعر المحكي بهالكتاب؟

·       هالكتاب قطفة حبق من شباك الضو

فيه لغه جديده.. صور مامرقت ع إدن أو عين.. خيال فالت.. وجمال ملوّن

درب جديد عالمملكه

 

*   شو هيّي مواضيعو؟

·       الغياب الواقف ورا الحيط من أول يوم بالعمر

الحياة للي بتخلص مع الموت وبتضّل أقوى منّو

الزمان الرايح.. وجايي

الميّ

والضو

 

*   وشو في بعد هالكتاب الأول؟

·       الكتاب الأول كتب مقدمتو الشاعر والأديب الكبير هنري زغيب

الكتاب التاني نشالله بيخلص قبل الربيع وكتب مقدّمتو الشاعر والفنان جوزف أبي ضاهر وإسم الكتابْ كرْم  السّما

 

 

*   وين موجود الكتاب؟

·       بشكل رئيسي:

-      المكتبة البولسية بجونيه على الرقم التالي : 009619911561

-       المكتبة البولسية بيروت 009611448806

السعر رمزي وريع الكتاب تبرّع للمهجرين من سوريا

 

*   ممكن تسمّعنا شي قصيده مش من الكتاب؟

·       إي كيف لكن.. هيدي قصيدة بيّاع

بيّاع

عالموت.. عالموت

..

والناس جايي وحامله توابيت

وكان الخرِج مليان

بيشبه مدن وضْياع

..

عالموت.. عالموت

..

إلا وصوت:

حوّل لعنّا هون يابيّاع

بالشام نزّل هالحمِل كلّو

 

..

ومن يومتا

تعبّت الأرض ومابقى بتساع

لو دقّ عاقبرك حدا

بالقبْر زحّلّو

 

*   وكمان شي قطعه من كتاب بيتين وتنّور؟

·       تكرم عينك

الجزيره

متل المَنام

 ل طاير بهالجوّ

 و نفّض عن تيابو

 تراب الفيّ

 بحسّ كل مَ فتحت

 طاقة ضو

 ومدّيت راسي عالغياب شوي

 متْل الجزيره

الطالعه من المي

 

*   بالختام شكرا دكتور إياد قحوش شاعر الضو على هالحوار الجميل ومنتمنى نشوفك عنا هون بلبنان

 

·       شكرا.. إنت شاعر كبير إبن شاعر كبير وأنا رح شوفك بلبنان بس كمان لازم نلتقى بسوريا بالوادي إلك محبين كتير وبيوت كتير

 

 

 

 
   
 

التعليقات : 0

 

   
 

.