جماليـــا : ثقافة , آداب , فنون

From site: http://www.jamaliya.com

بيت بْيوت


إياد أحوش
19/10/2012

 

لكْ آخ يابيروت
ياجْروح البْواب
للي تْفسّخت كتْر الرطوبه بالهوا

ياورْدةِ لّلي نْسيتْها
بقلْب الكتاب
وبقّع وجَعْها شعْر ساعة ماانْطوى

ياسْطوح
ياشرطان
ومْلاقط تياب
وأمّ .. وصبيّه بْإيدها محْبس ضوا

بيروت
بسّ تْكَزدْري فوق الغياب
تحتِك فساتين المْواج بتنْكوى

لك آخ يابيروت
مع تلج الدّياب
كبرنا سجر من نار .. موسِمْها اسْتوى

ومتل الحجار
الواقفه بنصّ القباب
منضلّ مامْنوقاع
ومْنبقى سوا
نبرْم ع يويو الأرض خطّ الإستوا


 

(اليويو هوي هاللعبه المخروطيه الإهليلجيه يللي كنا نبرمها عالخيط نحنا وزغار .. في ناس بيسموها البلبل)

(بيت بيوت أو في ناس بقولو بيت بيتون وهوي بيت من الرمل كنا نعملو نحنا وزغار وبالانجيل: في بيت أبي بيوت كثيرة )

 

 

 

 

 




Link: http://www.jamaliya.com/ShowPage.php?id=9661