"حبل غسيل" – شعر بالعامية

مِرمي ومَرفوع

مْمَرْمَغْ ومَنصوبْ

مِشْ عارف حَالو مين ولا وَين

حتى مِشْ ضايع من كِتر ما ضاع.

مشلول ومِتْلاشي

ناطِرْ ومش ناطِرْ

مَشْحوط ومْشَحْطَطْ

عَمْ يزْحَفْ مشلول واقف.

وفجأة هَيك بيقول:

" بَسّ خَلَص تبَهدَلت كفايه

مطرحي مش هَوْن

أنا فوق عَطول".

وفجأة صوت بيقللو: " طيِّب طْلاع. لَيش أصلاً شو نافِع إِنتَ تحت؟"

صَرَخْ حبل الغسيل: " لااااااااااا. حرام. آخ. هَيْك كتير".

ووصْلِتْ غيمِه تَتْشارِك بحفلة التّمِسخُر والمَصير

وعَطَسِت.

تمَرْمَغ التراب بالعَطسَه

و تمَرمَغ المشلول بوَحلْ المصير.

الشمس مش سِئْلانه

نَطَرِت وبُكرا إجِت تِتْغَندَر مع إنّا شايفي حفلة المصير.

تفَوَّهِت بأُفْ طويل رَجَّع التراب وَروَّحْ العطسَه

والغريب إنّو ...

يلّلا بلاها خلّينا ب يللي عَمْ بيصيرً.

يللي كانوا عَ حبل الغسيل، راحو يتْمَرمَطو من جديد

وهوّي طِلِع، طلَّعوو

وناطِرْ يرجعوا يلّلي بيخلّوا شِغِل عندو يصير

وما بيَعْرِف بعدا شو المصير،

ما هُوّي حبل غسيل.